Cumisser EU Pielbags giapa mpulsc sun l’energia Bulsan
USP – L Cumisser dl’Europa per l’energia Andris Piebalgs ie ncuei (22 juni) unì a Bulsan per cialé plu da daujin co che l vën laurà tla Provinzia de Bulsan n cont de energia alternativa. Da chësta vijites portel mpulsc nueves a Brüssel per lauré ora diretives europees n cont dl’energia alternativa. “Südtirol ie un di raions plu svilupei n cont de energia alternativa."
“Südtirol ie n raion particuler cun tëmps dassënn frëic y tëmps drët ciauc. Nëus cialon de ti vester a chësta situazion cun de plu formes de sparanië energia y de produzion de energia alternativa” nsci à l Presidënt Durnwalder prejentà la Provinzia al cumisser dl EU. “Nchin dl 2015 ulëssen pudëi baraté trëi cherc dl’energia adurveda (ora dl muvimënt sun streda) cun energia alternativa” à dit l presidënt dla Provinzia. L fin dla vijita ie stat chël de ti mustré al Cumisser cie che l vën fat tl Südtirol.
L cumisser Andris Piebalgs à spiegà che a Brüssel iesen tl lëur de anjenië ca la presidënza che unirà sëurantëuta dala Svezia. N cont de cëses tlima iel debujën de coordinazion a livel de Europa. A Bulsan iel stat mesun giapé mpulsc per la diretives che muessa śën unì lauredes ora. “La Provinzia de Bulsan ie un di raions plu svilupei n chësc cont y si suzes ie de gran mpurtanza per dessënie la diretives Europees” à dit l Cumisser.
La Cumiscion Europea ulëssa nchin tl 2020 arjonjer che l 20% dl’energia sibe alternativa. “N cont de energia geo-termica ie la Talia la prima nazion tl’Europa, Südtrol à da mustré su pusciblteies tecniches drët nteressantes” à dit l Cumisser ai reprejentanc di media.
Drët a cuer ti sta al cumisser dl Lettland nce l trasport de energia alternativa. L fin ie chël de arjonjer nchin tl 2020 che 10% dl trasport de energia vën fat cun energia alternativa. La “Wasserstoffmeile”, n proiet per la produzion de idrogenn danter Minca y Modena (650 km) ie per l Cumisser n proiet storich che fajerà scola a duta la Comunità Europea. Per chësc proiet à l Cumisser nce mpermetù aiut n cajo de bujën. De chësc viers à Piebalgs sorissà la mpurtanza de nfrastrutures alternatives, de nuzé porc y cunzec de trasport per n energia alternativa.
L assessëur Michl Laimer à tëut su cun gran sudesfazion l ntujiasm dl cumisser per l proiet dl „corridor vërt”. L se trata tlo de n proiet europeich per nuzé energia alternativa che tlo nce ite l tunel de prova dl tunel dl Prëner ulache n uel nuzé l ciaut da fonz su, l proiet dla produzion de idrogenn y l cunzet dla Cësa Tlima.
De Jené canche l unirà tenì i dis dl’energia a Brüssel sëurantulerà l cumisser Piebalgs l patrozine dla mostra da pert dla Provinzia de Bulsan.
as
