Scolars da La Pli protagonisc' da film
USP – Tla scora elementara Jepele Frontull a La Pli él gnü realisé n film dal titul “Les stries y la maza strinada”. I scolars é deventà protagonisc' de n film de 20 menüc che tol ite aspec dla storia dl paîsc y olache ai po adorè le lingaz dla uma. L film gnarà ince presentè pro festivals internazionai.
Trëi edemes alalungia ài laurè fora cun n pedagogh teatral na storia sön la tematica dl forest. Cun tröpa creativité y liberté, à i mituns metü adöm na storia. I aspeć y les carateristiches che vëgn dant te chësta cuntia, tol ite la vita da vigni dé, sentimënć de tëma, agresciun, la ria löna, le pordonn, le bun cör dla jënt.
Te chisc 20 menüć de film, vëigon la gran fantasia y le debojëgn di mituns de se lascè aldì, de cuntè de so monn, de sües idees, zënza la influënza di adulć. Dietmar Camper é ste bun de ti dè chësta liberté y le resultat é garatè. Al é gnü documentè la realisaziun dl film, les döes edemes de laûr, de intensité, olache i mituns s’à studié fora süa storia, à metü adöm les scenes, à chirì fora i posć, i rodi y i dialogs.
Chësc proiet valorisëia la cultura y le lingaz dla mendranza ladina. L’idea de tó ite i scolars dla scora elementara de n paîsc ladin à sciöche obietif chël de ti mëte a cör ala generaziun jona le tesur de so lingaz dla uma y dles raîsc culturales renforzan insciö süa identité ladina. Nia mà i mituns, mo inće sü geniturs, i insegnanć y la jënt dl paîsc é gnüs tuć ite te chësc proiet y à contribuì te na manira o l’atra a süa realisaziun.
Al é gnü chirì fora le film sciöche medium, por ti dè a chësc laûr na prospetiva plü ampla inće tl dagnì. Nia mà te Südtirol mo inće te d’atri paîsc vëgnel presentè, dantadöt te paîsc cun realitês de mendranza sciöche la nosta.
Un di obietifs é chël de conscidré y tó ite aspeć dla storia dl paîsc, dles usanzes tles families y dl svilup dla sozieté. I scolars à l’ocajiun de adorè so lingaz dla uma por realisé n film y ai ne n’à nia bria de adorè n lingaz forest sciöche te tröpes d’atres ocajiuns. Insciö se rëndi cunt che so lingaz y süa cultura ne n’é nia n ostacul, mo n vantaje y na richëza por ëi instësc y che vëgn aprijada da d’atri. Fora dl film, che gnarà presentè pro festivals internazionai, (sottitui por todësch y ingleisc) vëgnel inće fat Dvds. Chëstes vëgn menades te vigni scora de Südtirol y ares po gnì adorades sciöche material didatich. Al vëgn documentè 40 menüć dla pert dl workshop olache i mituns à laurè fora la cuntia cun le pedagogh y 15 menüć saràl da odëi le film, olache i scolars sarà i protagonisć de süa cuntia.
as
