„Junior Ranger“ do ai uciei tl Parch Naturel Fanes-Sennes-Braies
USP – Cun na jita per udëi i uciei à 15 mutons y mutans scumencià l curs de furmazion per deventé „Junior Ranger“. L Ufize provinziel per i Parcs Naturei deberieda cun i jëuni dla Lia da Mont (AVS) à nvià via l cunzet dl „Junior Ranger“ per mutivé i jëuni per la natura, rafurzé si liam cun la cuntreda y i fé deventé pasciunei de natura.
Nchin de setëmber jirà i mutons y la mutans de ndut set iedesc ncantëur tl Parcs Naturel Fanes-Sennes-Braies per mparé a cunëscer miec l cumpurtamënt dla natura, co che vif i nsec, ti cialé a raions de vita di tieres manacei, cunscidré i tieres salveres y pastelné cun materiai naturei. Ai mëndri ti vëniel nce nsenià a se urienté cun cherta y bussola, a pité prim aiut y a ciarcë cie che la natura nes dà da maië.
15 mutons y mutans à scumencià si furmazion per deventé „Junior Ranger“ cun na jita a ti cialé ai uciei sun la Plätzwiese tla raion de Sennes-Braies. Da duman abenëura iel unì spiculà do ai uciei cun la rola per capì coche scibla i uciei defrënc. Do l gusté tla utia Dürrenstein à n culaburadëur dl Parch nsenià ciunes che ie la particulariteies di uciei da tlo.
La furmazion a „Junior Ranger“ ie unida metuda a jì sun ejëmpl a na lingia de bona esperienzes che ie unides fates oradecà. „L fin ie chël de ti fé viver la natura ai mëndri y nsci ti mustré la pertes che ie da defënder y mantenì“ spiega l diretëur dl Ufize provinziel per i Parcs Naturei Artur Kammerer. De setëmber uniral stlut ju l proiet cun na festa per i 15 „Junior Ranger“ cun si genitores y i urganisadëures.
La fotografies per udëi velch dla jites di „Junior Ranger“ ie nce da udëi tl internet, sun la plates per i jëuni dl Ufize per Parcs Naturei (www.provinz.bz.it/daksy).
as
