De plu maturanc tla scoles ladines
USP – Duman, 25 juni, scumëncia nce tla scoles autes dla valedes ladines la matrua. Cun 60 candidac, iel chëst ann 28% de plu sculeies permez al ann passà che fej l ejam. „Ti mbince dut l bon ala sculees y ai sculeies per chësc ejam mpurtant“ nsci l assessëur ladin Florian Mussner che se ncunforta dl aumënt dla cumpëida de maturanc a Urtijëi y a La Ila.
Tla cater scoles autes de Gherdëina y Badia scumëncia duman l ejam de matura per de ndut 60 sculeies. L ann passà nen fovel mo 47 y nsci iel chëst ann 13 candidac de plu. L Istitut tecnich Raetia a Urtijëi à da mustré su n aumënt de catordesc sculeies, che ie passa mo n tanc permez al ann passà. „Sce chësta cumpëida devënta costanta iel de gran valor per la scola ladina“ spiega l ntendënt Roland Verra, „a chësta maniera iel nce plu pusciblteies de avëi maturanc cun de bona notes“. Tla scola auta de La iel iel chëst ann 14 candidac dla matura tl Istitut y 9 tl Liceo. Tl Istitut tecnich a Urtijëi iel 25 sculeies che fej l ejam y tla Scola d’Ert 12. „L aumënt de candidac ala matura me fej plajëi, ajache te chisc tëmps melsegures tl’economia ie na bona furmazion mo de majera mpurtanza per nosc jëuni“ soirssea l assessëur Florian Mussner.
Tla scoles autes ladines uniral duman juebia scumencià l ejam de stat, la matura cun la prova scrita de talian o tudësch. I candidac possa nstës crì ora danter la doi rujenedes. L segondo di de ejam uniral fat na prova scrita aldò dl urientamënt dla scola: economia aziendela y scienzes turistiches tl ITC a Urtijëi, proieté tla Scola d’Ert Cademia, rujeneda fulestiera tl Lizeo a La Ila y economia aziendela tl ITC de La Ila. La terza prova scrita vën nce tla scoles autes ladines metudes adum dala cumiscion y reverda la rujeneda che ne ie nia unida crissa ora l prim di. Tla cuarta prova scrita muessa i candidac mustré su si savëi tl’autra materies fé culegamënc. I ejams a usc scumencerà aldò dla cumedures dl scrit, ai prims de lugio.
as
