Nueva stala didatica tla scola auta per lëur da paur (cun audio)
USP – Pra l luech Happacher che fej pert dla scola auta per lëur da paur a Auer vëniel fat su na stala didatica. Deberieda cun l Presidënt dla Provinzia Durnwalder y l assessëur Mussner iel n mierculdi (24 juni) unì festejà la colm.
Ajache l luech Happacher ie massa pitl per l nseniamënt pratich, fej l Assessorat provinziel per lëures publics na stala nueva te chëla che l unirà dantaprima nsenià a zidlé bestiam. “Tla proietazion iel unì tenì cont che tla strutura possel nce unì tenì cursc y che la se adatea nce per la facultà de lëur da paur dl’Università de Bulsan” à spiega l presidënt Durnwalder. La stala didatica dëssa sëuraprò nce unì nuzeda per l nseniamënt dla soles elementeres y mesanes.
Tl cunzet dla strutura nueva iel unì tenì cont dl zidlé de de plu sortes de bestiam. De ndut iel trëi pertes: la prima per l nseniamënt te tlasses, la stala per mparé a mëujer y n tublà per l fën cun silo. La segonda pert taca adum cun la prima y pieta lerch a na stala ulache l bestiam possa se muever cun na stala per mustré l bestiam. Te chësta strutura iel nce lerch per ciavei, biesces, cëures y purciei. Magasins y lueges per la mascins da paur giapa lerch tla terza pert dla strutura.
“Duta la proietazion ie unida fata dala Repartizion provinziela per la frabiches y nsci ons pudù sparanië tl custimënt judan nce a tenì ite l pat de stabilità” sorissea l assessëur Florian Mussner. I lëures per la stala didatica à metù man de jené y per l ann nuef fejen cont de pudëi mëter man la lezions tla strutura nueva che vën a custé feter doi milion de Euro.
as
