Ndicazions per la scoles ladines dates pro a Roma
USP - L Cunsëi Naziunel dla Publica Istruzion a Roma à n lunesc (22 juni) dat pro la Ndicazions Provinzieles per la Scoles elementeres y mesanes ladines. Do passa 20 ani, porta la ndicazions inuvazion di cuntenuc y dla metodologies dl mparé per la scola ladina. La majera nuvità che jirà n dorva de setëmber cun l ann de scola nuef, reverda la scola elementera cun n’ëura de nseniamënt de plu.
Cun duta la ujes a una à l Cunsëi Naziunel a Roma azetà l documënt per la scola ladina. L Ntendënt ladin Roland Verra, che à reprejentà la Provinzia de Bulsan ntan chësta senteda, à pudù cunstaté cun plajëi l gran nteres per l model plurilinguistich. Dantaldut l’adurvanza paritetica dl talian y dl tudësch sciche rujenedes de nseniamënt y la puscibltà de adurvé l ladin te uni ucajion coche mesun de spiegazion ie unides auzedes ora positivamënter dai esperc de scola de chël gremium. “L’azetanza a Roma fej plajëi ajache la ndicazions cumporta n var inant per nseniamënt dla scola ladina” sorissea l assessëur ala scola ladina Florian Mussner, “L ie stat n gran lëur che ie unì njenià ca bën dal pont de ududa dla politica dla scola y sambën nce tecnich-didatich”.
Chësc documënt de ntëur 200 plates ie l frut de n lëur y de na sperimentazion de reforma che va bele inant da cater ani y se tol dant na inuvazion di cuntenuc y dla metodologies dl mparé, aldò dl prinzip dla personalisazion y dla individualisazion. L documënt ie nce unì ntegrà cun prupostes sun l nseniamënt aldò dl cunzet di lingac, y cun la usservazions che ie unides dala scoles nstësses.
La majera nuviteies reverda la scola elementera. Dala segonda ala cuinta tlas uniral juntà mo n’ëura de nseniamënt. Per i plu pitli, tla prima tlas iel unì udù dant la puscibltà de tò demez doi ëura. La singula scoles cun si direzion y cunsëi de scola possa tò la dezijion sce fé l prim ann de scola n pue’ plu lesier, partian su duta l’ëures a na maniera che vel sada resta liedia.
Cun chësc arat positif, scrit dant dala normes dla scola, possa la ndicazions Provinzieles, bele apruvedes dala Jonta Provinziela de Bulsan, jì n drova cun l ann de scola 2009/10. Śën meterà man l lëur dla scoles autonomes, cun l sustëni dla Ntendënza Ladina, de urganisé l curriculum, l plann de lëur sun mesura dla situazion de uni istituzion formativa aldò dla Ndicazions Provinzieles.
as
