Messner y Lamonaca vënc l pest provinziel per artisc’ ladins
USP - Philipp Messner de Urtijëi y Giancarlo Lamonaca de S.Martin de Tor à venciù l pest scrit ora dala Repartizion ala Cultura ladina dla Provinzia de Bulsan. Na bela cumpëida de artisc’ à fat pea l cuncors per ladins de duta cin valedes ladines. A 11 artisc' ti vëniel d’autonn dat la puscibltà de mëter ora si opres tla Galaria Prisma a Bulsan.
Giancarlo Lamonaca y Philipp Messner à mpresciunà la giuria tla maniera de traté l argumënt metù dant y cun si realisazion tecnich-artistica adurvan de plu materiai. Lamonaca à fat doi chedri cun fotografies metudes nsëuralauter che semea na pitura. L’artist da S.Martin mostra te si lëur dal titul “Horizon no. 2” doi lueges simboliches di ani di atentac tl Südtirol jan a crì l raport danter tëmps passei, eroism y identità. Giancarlo Lamonaca à 36 ani, lëura y vif a Vahrn.
Philipp Messner à prejentà na scultura de mitel a forma de stëila. Cun si pez dal titul “The rising star” à ël ulù fé n viac tl simbulism che ie n aspet drët sterch tla mistificazion di eroi. Messner, 34 ani de Urtijëi, vif y lëura a Minca. Duta la giuria ie stata a una che l pest de 15.000 Euro dëssa unì spartì danter i doi artisć. L titul dl pest scrit ora ie stat “Concurs artistich 2009… eroism, inier, incö doman” y fej referimënt al ann comemoratif 1809-2009.
“Me fej plajëi che artisc’ che à bele suzes oradecà à fat pea y à nce venciù chësc pest per i ladins” se ncunforta l assessëur Florian Mussner. I doi artisć che à venciù l pest y mo 9 d’autri giapa ucajion de mëter ora si lëures tl cunesciuda Galaria Prisma a Bulsan. La mostra sarà da udëi dai 20 de nuvëmber ai 5 de dezëmber 2009 y te chësta ucajion uniral nce fat la premiazion.
Fat pea à 28 artisć, vel un nce da ora dla Provinzia de Bulsan. Permez ala prima edizion dl pest per artisć ladins dan sies ani, iel chëst ann stat mo n tanc che à fat pea. “L ie bel che chësta scumenciadiva à cuntinuità y per i artisć iel nce na bona ucajion per purté a cunescënza nosc mond artistich ladin” spiega l assessëur provinziel Mussner. La tecniches adurvedes ie states drët mescededes da nstalazions y scultures a tecniches plu modernes cun fotos y collage. I artisć ladins à adurvà materiai inuvatives sciche mitel, plastica n cumbinazion cun gas, ma nce materiei plu tradiziunei sciche lën o l bront.
L mpëni de crì ora i lëures che à respetà miec l argumënt metù dant cun na bona realisazion artistica, se à sëurantëut na giuria de cin esperc. Chisc ie stai l diretëur dla Scola d’Ert de Urtijëi Karlheinz Mureda, l prufessëura de storia dl’ert Danila Serafini, l artist y espert dla cunsulta tudëscia Gotthard Bonell, l artist cunesciù dla Val Badia Claus Vittur y la storica d’ert Sabine Gamber.
Cun l pest per artisć ladins uelen da pert dl Assessorat provinziel ladin judé inant la gran tradizion artistica dla valedes ladines y dé na sburdla de mutivazion acioche dantaldut jëuni posse jì inant sun chësta streda.
as
Galaria dales fotografies
foto USP
foto USP
