La Dolomites ie arpejon culturela dl Unesco
USP – L Cunsëi dl’urganisazion mundiela per l cultura Unesco à ncuei (26 juni) detlarà la Dolomites “arpejon naturela mundiela”. “La Dolomites à a chësta maniera giapà la majera recunescënza al Mond per n raion naturel” sorissea l presidënt dla Provinzia Luis Durnwalder y l assessëur Michl Laimer. L assessëur ie nstës stat a Sevilla canche l cunsëi mundiel dl Unesco à fat la detlarazion.
Cun l titul de 'arpejon naturela mundiela' ti an dat ala Dolomites na cherta da vijita de gran pëis, sorissea Durnwalder do la dezijion da ncuei dla Unesco. Per Laimer ie la titulazion dla Dolomites la majera arjonta per la politica de defënder la natura, tenian cont che l raion recunesciù dal Unesco tol ite cater parcs naturei. „La mutivazion da pert dl Unesco per ti dé chësc titul ala Dolomites ie si belëza monumentela unica” spiega l assessëur Laimer.
Da pert dla Jonta provinziela de Bulsan ne vëniel nia me dat pëis al aspet de retlam, ma nce al valor per la populazion nstëssa. “Speron che chësta cunfermazion ufiziela che vivon te n raion unich al Mond, porte nce a n cumpurtamënt de respet y respunsabltà te chësc raion” à dit Laimer.
La dumanda per chësc titul ala Dolomites reverda n raion te cin Provinzies. Tla Provinzia de Bulsan iel i parcs naturei Trundner Horn, Puez-Odles, Scilier-Ciadenat, Latemar, Fanes-Sennes-Braies y la Dolomites de Sexten cun dla “Drei Zinnen”. Gran pert de chisc raions fej mprescion per si parëies de crëp, ciampanii, gran desliviei, de gran montes cun pastures. De valor ie nce i raions da na cuntreda manco spetaculera sciche l Trudener Horn, che à na gran richëza tla flora y fauna.
as
