Jugendring y l assessëur Mussner trata i bujëns di jëuni

Cun truepa ideies y prupostes se à cater reprejentanc dl „Jugendring“ prejentà dal assessëur Mussner. I argumënc tratei reverda i jëuni te si tëmp liede nchin a tematiches de gran mpurtanza sciche la prevenzion da dependënzes y la situazion atuela di jëuni n relazion a lëur y studi.

Tl’ancunteda iel nce unì rujenà dla cunvivënza danter la cultures. L’assessëur à metù a cuer de tò su chësc argumënt tl’ativiteies di jëuni cun l fin de arjonjer iust danter i jëuni na miëur azetanza y respet per diversiteies. L „Jugendring“ dëssa nce tl daunì sustenì ucajions ulache i jëuni se anconta, se rejona, fej descuscion y se barata esperienzes. Acioche i jëuni giape nce chël sustëni che i se adrova, iel unì rujenà dl bujën de culaburazion cun istituzions de furmazion sciche la scola. „Me fej plajëi de tenì de bon cuntac cun i respunsabli dla lies per i jëuni ajache i jëuni se merita do mi ntënder na gran mpurtanza“ nsci l pensier dl assessëur provinziel ladin.

Katja Nocker de Sëlva, presidënta dl „Jugendring“ à purtà dant la situazion pesocia per la lies di jëuni n cont dla burocrazia. Da permò à l Cunsëi provinziel dat pro de nciarië n aucat per i dërc di mëndri y di jëuni. „Sciche assessorat ladin ons nce la cumpetënza per i jëuni ladins, y on for sustenì l aucat per jëuni. Son cuntënt che l ie śën unì azetà te Cunsëi“ à dit l assessëur Florian Mussner.
Deberieda cun l aministradëur dl „Jugendring“ Michael Peer ie unì purtà dant n cheder generel sun argumënc de atualità che sta a cuer per l bën di mëndri y di jëuni tla Provinzia de Bulsan, ma nce per l bën dla lies di jëuni. L lëur per i jëuni à per l Assessorat Ladin na gran mpurtanza ajache i jëuni ie l daunì, i jëuni dëssa se n sté bën y avëi la cundizions aldò  per abiné si streda.