Jonta provinziela per n zënter de nrescida sun l prim aiut tla montes
USP – La Provinzia de Bulsan uel mëter su n zënter de nrescida per medejina de prim aiut tla montes. Chësc ie unì fat ora ncuei (6 lugio) dala Jonta provinziela. L presidënt Durnwalder à do la senteda prejentà i ponc de majer nteres: l giaurì de uties dl CAI, n daz sun l jëuf Stelvio, la cherta Museum mobil, la plaza dai auti pra l spedel de Bulsan y n zënter de nfurmazion sun l tunel dl Prëner a Furtëza.
Zënter de prim aiut tla montes
La Jonta provinziela à fat ora de ulëi mëter su n zënter de nrescida per medejina de prim aiut tla montes. “Ajache on urganisazions de gran esperienza tla montes ulessan mëter su l prim zënter de chësta sort tl Europa” à dit Durnwalder. L’idea dla Jonta provinziela ie de junté chësc zënter de nrescida pra l’Academia Europeica EURAC. Duc i assessëures ie stai a una cun chësta pruposta y nsci uniral metù man de rujené cun la categuries nteressedes. “Śën che la Dolomites fej pert dl’
Arpejon naturela dl’Unesco, iel nce drët che l vënie fat vares inant n cont de istituzions per la montes” à spiegà l Presidënt dla Provinzia.
Uties da mont dl CAI
24 uties da mont passerà cun l prim de jené 2011 dal Stat ala Provinzia. La lia da mont CAI ne à ultimamënter nia plu fat lëures de mantenimënt pra chësta uties y nsci ne à chëst instà vel una nia pudù unì giaurìda. Śën uniral tëut su cuntac cun l CAI per cialé che la Provinzia possa fé i lëures de mantenimënt bele n ann dant che la devënta patrona y a chësta maniera schivé che la uties vede ntant n broda.
Daz sun l jëuf de Stelvio
L instà che vën saral da paië n daz per furné sun l jëuf dl Stelvio. La Jonta provinziela à ncuei dat pro, a una cun i chemuns nteressei, de fé paië per furné su per l jëuf plu aut dl’Elpes zentreles (2.753 metri). Deberieda cun i chemuns cialeran śën do la via plu scëmpla y che costa de manco per fé paië chësc daz. Chël che vën trat ite unirà adurvà per pité n miëur servisc a chëi che va su per l jëuf, n pënsa tlo a plazes dai auti y plazes da ti cialé ala cuntreda. “Tl cajo dl jëuf Timmel restel 400.000 Euro al ann per nvestimënc” à juntà Durnwalder.
Museum mobil
Na cherta nueva per vijité museums provinziei y l trasport publich leprò ie unida data pro ncuei dala Jonta provinziela. Per n priesc de 22 Euro (11 Euro per mutons) possen te tëmp de 7 dis tò la curiera o la ferata per jì nchin pra l museum y nce l vijité. Jënt da tlo y turisć possa cun chësta cherta vijité uni museum un n iede. La cherta per trëi dis costa 16 Euro y 8 Euro per i mëndri. Chël che vën trat ite unirà spartì danter trasporc publics (45,5%) y la repartizions per la cultura (54,5%).
Plaza dai auti pra l spedel
La Jonta provinziela ie dla minonga che per lascé l auto pra l spedel a Bulsan dëssel unì paià 1,20 Euro al’ëura. La sozietà de gestion Hospital parking se damanda 1,80 Euro y l Provinzia messessa paië la defrënzia. N fej tlo cont che chësta defrënzia pudëssa unì a custé nchin a 800.000 Euro al ann y nsci iel unì fat ora de cumpré la firma. I patrons dla firma se damanda 16 milion de Euro. Da pert dla Provinzia uniral mo fat vel analisa y pona marciadà per l priesc.
Zënter per l tunel dl Prëner
I locai tl Furtin de Furtëza (che vën śën adurvei per la mostra interregiunela) dëssa unì adatei per anjenië ite n zënter de nfurmazion per l tunel dl Prëner y la linies dla ferata nueves da ti ruvé permez. L custimënt de 4 milion de Euro unirà finanzià per na terza pert dala sozietà che fej l tunel y per doi terzi dala Provinzia. L mubilia unirà paieda defin dala sozietà tl tunel dl Prëner.
Vijita dl minister Maroni
La mëisa de descuscion sun la cunvivënza cun l minister Maroni muessa l proscimo iede unì metuda a jì miec. L presidënt Durnwalder se à lamentà dla cunfujion de nfurmazions che fova unides dates danora. “Duc chëi che à rujenà pea ie stai cuntënc di cuntenuc. L se trata de na cuestion aministrativa y nia politica” à sorissà Durnwalder. Aldò dl Presidënt dla Provinzia se tratela śën n iede de cuestions daviertes cun Roma y perchël iel mpurtant che l minister Maroni sibe prejënt. Da pert dla Jonta provinziela uniral fat na lëtra cun i problems che possa riesc giapé na soluzion, l se trata tlo de 10-12 ponc. Per cuestions sciche la scola o l pruporz iel aldò de Durnwalder debujën de fé madurì y rujené ora ciuna che ie la streda da tò. Do la prima ancunteda, rengrazia Durnwalder l minister Maroni per la scumenciadiva dla mëisa de descuscion.
Referendum
Per l referendum dl 25 utober à la Jonta provinziela dat pro n custimënt de 2 milion de Euro. Aldò de Durnwalder ne basterà chisc scioldi nia per curì la spëises di chemuns. N fej cont che l referendum possa unì a custé nchin a 3 milions de Euro.
Zircunvalazion a Rabaland
La Jonta provinziela à ncuei dat pro de ntegré tl plann urbanistich la streda de zircunvalazion per Rabland. “L ne ie nia stat na gran maiuranza per chësta dezijion, ma ala fin ons tenì la linina che à metù dant l chemun de Partschins” à dit Durnwalder.
Servisc tesorier
La provinzia scrij ora n cuncors per l servisc tesorier per cin ani. La banches nteressedes possa dé ju na pruposta per l servisc de cin ani dal 2010 al 2014.
Lege ombibus
La Jonta provinziela à dat pro doi prupostes de lege omnibus. Per l’agricoltura se tratela de adaté la lege provinziela a normatives dla Union Europea. Tl ciamp dl personal provinziel se tratela de stlarimënc y adatamënc ala normatives metudes dant da Roma.
as
