Cater matures da 100 ponc tla scoles ladines
USP – Tla scoles autes ladines ie 59 sculeies passei l ejam de maduranza. Cater mutans à finà via la scola auta cun la miëura nota de 100 ponc sun 100. Cun chisc resultac ne iel chëst ann no me stat de plu sculeies che à fat la matura ma nce de plu che à arjont duc i ponc.
Sun 60 sculeies che à pudù fé l ejam ie 59 passei y à nsci finà via la scola auta paritetica. Ti doi istituc tecnics fovel la majera cumpëida de sculeies, a Urtijëi ie duc 25 passei l ejam y a La Ila duc i 14 candidac. Eveline Rudiferia de Badia à tlo arjont duc i 100 ponc. Tla Scola d’Ert a Urtijëi iel 12 che à fat la matura y doi à arjont la miëura notes: Johanna Kostner de Urtijëi (depënjer) y Isabell Senoner de Sëlva (grafica). Tl Lizeo linguistich a La Ila ie passei 8 sun 9 candidac. Silvia Costabiei da La Val ie passeda l ejam de maduranza cun duc i ponc.
“L fej plajëi che feter duc ie passei, ti mbinci dut l bon per l capitul nuef che se gëura śën te si vita y che i se abiné si streda” à dit l assessëur Florian Mussner. “Chisc ie de boniscimi resultac. Cater sun sessanta che à arjont i 100 ponc fej bën gran legrëza ajache n muessa tenì cont che l sistem paritetich cun de plu rujenedes se damanda mo n majer sforz” sorissea l ntendënt Roland Verra.
L ann passà fovel 47 sculeies che à fat la matura, duc fova passei y trëi mutans ova giapà la miëura notes.
L ejam de maduranza tla scoles autes ladines à n urdenamënt particuler: i candidac possa crì ora de fé la prima prova scrita o per tudësch o per talian, ma pona muessi fé la terza prova scrita te chëla rujeneda che i ne ova nia cris ora. Tl ejam a usc vëniel adurvà belau for duc i lingac dla scola, chël uel dì che tl Lizeo Linguistich da La Ila per ejëmpl possa l ejam tuché cin’ rujenedes y chësc possa nce valëi per l urientamënt Linugistich-turistich tl ITC Raetia de Urtijëi.
as
