Berger a Garmisch per la ressoluzion sun l lëur da paur tla montes
USP – Na ressoluzion per defënder l lëur da paur tla montes ie ncuei (10 lugio) unida sotscrita dal assessëur Hans Berger y si coleghes di raions da mont y data inant al cumisser dl’Europa per l'agricultura Mariann Fischer Boel. Ucajion per la ressoluzion à dat la cunferënza nternaziunela per l lëur da mont a Garmsich. “Al’Europa damandons segurazions per l tëmp che vën do l 2013 n cont de politica dl lëur da paur tla montes, cun modiei de finanziamënt a pert che garantësc servijes ala comuniteies che viv y lëura tla montes” à dit Berger te si rujeneda a Garmisch.
L cumisser Fischer Boel ova damandà prupostes cuncretes dala regions da mont, a Garmisch ala pona dit che la ressoluzion unirà studieda tres apuntin y tenida cun gran cunsciderazion per la diretives dla politica agricula do l 2013. Rujenan cun Fischer Boel à l vizepresidënt dla Provinzia giapà mo d’autra respostes: “Ëila à mpermetù de unì d’autonn a Bulsan.” N cont dla cunferënza finela dl cumisser UE sun la linies dla politica agricula do l 2013, vëniel valutà la puscibltà de la fé deberieda danter Bulsan y Trënt.
Berger ti à metù a cuer al cumisser che l lëur da paur tla montes ne dëssa da pert dla UE nia me unì cunscidreda do si valor de marcià, ma dlongia la produzion de cualità, cëlela nce a aspec fundamentei dla persona sciche l servisc per la cumenanza n cont de mantenimënt dl cuntreda, l straverde dla richëzes natureles, l cumbater dl jì a sté te zità, l mantenimënt dla cultura y dla tradizion di raions da mont.
Te si ntervënt a Garmisch, à Berger batù sun l debujën che la Union Europea feje riesc ntervënc per astilé ora che raions da mont se la paie deplù che d’autri per via dla crisa economica. “Damandon na linea spezifica dedicheda ala politica per l lëur da paur tla montes, cun si modiei de finanziamënt, scëmplificazion burocratica y sustënies economics” à dit Berger. La cunvenzion per l cumisser ie unida sotscrita da reprejentanc dla Provinzia de Bulsan, Trënt, Bayern, Tirol, Vorarlberg, Friul y Aosta. Danterauter vëniel nce damandà n pest per la vaces, de plu aiuc per l svilup dla campanies, de plu aiuc per nvestimënc tla strutures, cuntribuc per l trasport di prudoc, regules scëmples y tleres per la zertificazion de cualità di prudoc da mont y nvestimënc tla nrescida y svilup.
Per seguré n daunì al lëur da paur tla montes iel nfati debujën de dé na cumpensazion granda assé che vel nce tant che la funzions defrëntes che à l agricultura ti raions da mont” à stlut ju Berger.
as
