Di dla Scola ladina tl sëni dl nseniamënt dl ladin
USP - L Di dla Scola ladina, la tradiziunela ancunteda de dut l personal dla scoles y scolines ladines al scumenciamënt dl ann, sará chëst’ iede a La Ila ai 11 de setëmber 2009 tla Ciasa dla Cultura, cun scumenciamënt dala nuef danmesdi.
Do la rujenedes dla Assessëur Florian Mussner, dl Intendënt Roland Verra y de autra autoriteies, sarà l Prof. dla Università de Bulsan Paul Videsott a tenì l referat prinzipel sun l tema “Ciun ladin per nosta scola?”, n argumënt de mpurtanza particulera per na scola de mendranza. L ie da tenì cont che la scola ladina se caraterisea da una na pert per si plurilinguism, ma dal’ autra pert nce per si funzion de nseniamënt y promozion dl lingaz ladin. La scolina te Gherdëina y tla Val Badia ie, aldò dl Statut de Autonomia, fundamentalmënter ladina. L ie perchël mpurtant ti dediché n iede l Di dla Scola ladina, che ie nce na ucajion de formazion dl personal de scola, al tema dl ladin te scola, de si problematiches y de si puscibiliteies. L Prof. Videsott, respunsabl dla catedra de Ladinistica tla Facultà de Scienzes dla Formazion a Persenon, ie perchël segurmënter l referënt plu adatá per traté chësc argumënt.
La curnisc musichela dla manifestazion vën segureda dal Cor di Maestri dla Val Badia, che do na longia tradizion de lëur culturel, se á inò metù adum te chisc ultimi tëmpes.
I rapresentac di media ie nviëi
al „Di dla Scola Ladina“,
n vënderdi ai 11 de setëmber 2009, dala 9 danmesdi
tla “Ciasa dla Cultura” a La Ila
y nce de l dé tres.
SAN
