Zircunvalazion de S.Crestina stluta per finé lëures
USP – La streda de zircunvalazion de S. Crestina resta mo sareda per diesc dis per pudëi finé de plu lëures. L muvimënt di auti puderà la dumënia ai 11 de utober inò passé sun i 1.679 metri de streda nueva y tres i doi tuniei.
La streda de zircunvalazion nueva oven ai 16 de lugio ulù giaurì per lascé passé l gran muvimënt dla sajon auta. Lëures che ie mo restei da fé ala lergia y ti tuniei vën fai chisc dis. “La se trata de finé la nfrastrutures tecniches ti tuniei y finé vel pitl lëur pra la roles dal’ega sota i puenc” spiega l ing. Georg Fischnaller. Sun la streda nstëssa vëniel metù l’ultima pert de asfalt y sëura la ntredes di tuniei iel debujën de fé crëscer ite miec. Acioche la nëif ne tome da chësta lueges nia ju sun streda vëniel nce fat vel toch de sief de lën.
Per ntegré mo miec i puenc tla cuntreda fovel da pert dla Assessorat ai lëures publics unì fat n cuncors per abiné na nota architetonica y nsci n cialé ora miëur. I dlandri di puenc, aldò dl proiet che à venciù l cuncors, unirà metui su de nuvëmber.
as
