„Assudëi Tibet“ tl Museum Ladin
USP – “Assudëi Tibet”, a chësc moto ie dedicheda la sëira de n vënderdi 9 de utober tl Museum Ladin a San Martin de Tor. Tl cheder dla mostra “Sëura la montes tl viers dla libertà” saral la reghissera dl’Austria Maria Blumencron a prejenté dala 8 da sëira si liber dal titul "Auf Wiedersehen, Tibet". L ntreda ala sëira cun prejentazion multimedia ie debant.
L’autora Blumencron conta dla storia de vita de mëndri y jëuni mucei dal Tibet per pudëi mantenì si cultura y si religion. Ëi mucia su per pasc auc 6000 metri nchin a Dharamsala, la sënta dl Dalai Lama tl esil tl Nord dl India, mentan si vita te pericul. Bele la realtà che genitores manda si mutons sun n viac tan periculëus zënza savëi sce i ne i uderà mei plu dij bele truep n cont dla situazion dramatica.
Cun mujiga, toc de film, paroles y chedri mostra Blumencron su l mucé de chisc mutons. Tl Museum Ladin fej ëila nce la dumandes de cie che nëus fajessan sce l nes unissa tëut nosta cultura, nosta identità y nosta tradizions o nosta religion. Ce mpurtanza à pa per nëus chisc valores, tan dassënn cumbatessansa?
La reghissera y autora austriaca Maria Blumencron se dà bele ca plu ani per l Tibet. Si filmes documenteres à giapà de plu pesc’, nsci "Flucht über den Himalaya – Tibets Kinder auf dem Weg ins Exil" y "Jenseits des Himalaya – Tibets Kinder im Exil". N cont de libri ala scrit "Flucht über den Himalaya" y sën nce "Auf Wiedersehen, Tibet".
La prejentazion dl liber vën tenida n ucajion dla mostra speziela “Sëura la montes tl viers dla libertà” tl Museum Ladin, mostra ispireda al cunzet dla libertà. Chësta mostra n relazion al alpinism dla valedes ladines ie dedicheda al arpizadëur Karl Unterkircher.
Velch de plu ie nce da liejer do sun la plata intenet dl Museum Ladin http://www.museumladin.it/news/news_l.asp
as
