Ngrandì la mensa tla Cësa di studënc a Urtijëi
USP – Davia che tla cësa di studënc a Urtijëi fovel l ann passà unì aumentà la cumpëida di liec, iel ntan chësc instà nce unì ngrandì la mensa. La gran dumanda do lueges tla cësa “Assudëi” y l pudëi marendé desmostra che la strutura vën nuzeda mo deplù che n se ova aspità.
Dal ann passà pieta la cësa “Assudëi” da albierch per 53 persones, mpede per 41 sciche canche la fova unida giaurida de autonn 2007. Per chësta rejon iel nce stat debujën de ngrandì la mensa. N cianton de feter 90 metri cubich, che fova bele sota tët ie unì stlut su cun parëies de scipa. Mpede 80 lueges iel tla mensa sën lerch per 100 persones al iede. Tlo ne marendea nia me i studënc che dorm tla cësa ma nce d’autri che à domesdì scola. Nsci giapa tlo di per di, da 120 nchin a 150 persones da marënda.
L aumënt de sculeies ie n sëni de crëta per la scoles autes de Gherdëina. “On nce for de plu sculeies da ora dla valeda, chësc uel di che i prijea l sistem scolastich ladin, la scola paritetica” nsci l assessëur ladin Florian Mussner.
L aumënt de lueges da durmì se à nce damandà vel auter lëur de adatamënt. L local da cialé televijion ova messù ti fé lerch a na majon cun liec. Ntan l ultimo instà iel ora dl local de ginastica, tl partimënt sota tiera, unì fat n local da cialé televijion, fé juesc y suné strumënc. L ie tlo stat debujën de fé na ijulazion per la fuera. Per fé ginastica possa i studënc jì tla palestra che ie tla cësa dlongia. Per la lavandaria y n ufize iel unì adatà l’ariazion. De ndut iel per duc i lëures de adatamënt da chëst an unì spendù ite 160.000 Euro.
L aumënt de studënc tla scoles autes a Urtijëi ie dantaprima unit al se l dé tres l suzes dla sezion per l sport tl Istitut tecnich y dla Scola d’Ert. La cumpëida de iscrizions ie ti ultimi 5 ani aumenteda de ndut 50 sculeies: tla Scola d’Ert da 70 a 90 sculeies y tl Istitut Tecnich Raetia da 130 a 160 sculeies.
as
