Zircunvalazion de S.Crestina gëura duman, vënderdi sëira
USP – La streda de zircunvalazion de S.Crestina ova messù unì sareda per pudëi finé de plu lëures. Duman da sëira, vënderdi 09 de utober unirà la streda inò giaurida. Plu abenëura che calculà danora puderan inò astilé ora l zënter dl luech y passé sun la zircunvalazion nueva.
Ntan l’ultima doi enes iel unì finà la nfrastrutures tecniches ti tuniei y vel pitl lëur pra la roles dal’ega sota i puenc. Sëura la ntredes di tuniei an fat su vel sief de lën acioche la nëif ne sbrisce nia ju sun streda. Ntan chisc lëures iel nce unì metù l’ultima pert de asfalt fin.
Ntan l instà se à la jënt bele usà a furné sun la streda de 1,7 chilometri y tres i doi tuniei. Do truep ani an zënter dl luech ntan la sajon inò abù plu gheneda dal gran muvimënt di auti cun truep fum dan porta. Per la jënt de S.Crestina iel dal 16 de lugio inant nce stat na prima speriënza a avëi la streda sareda ntan la sëira, cun plu chiet y lerch per jì a pe.
Per ntegré mo miec i puenc tla cuntreda fovel da pert dl Assessorat ai lëures publics unì fat n cuncors per abiné na nota architetonica y nsci n cialé ora miëur. I dlandri di puenc, aldò dl proiet che à venciù l cuncors, unirà metui su de nuvëmber.
as
Galaria dales fotografies
La streda gëura inò n vënderdi sëira, 9 de utober.
