Jonta provinziela: notes per i sculeies
USP – La Jonta provinziela à dat pro che tla scoles vëniel inò dat notes mpede valutazions. Per la firmes che ne giapova nchin sën nia cuntribuc provinziei iel unì fat na categuria nueva. Al bilanz provinziel de previjion ie unì juntà 52 milion de Euro. Chisc ie stai i ponc de majer nteres che l presidënt Durnwalder à prejentà do la senteda dl 12 de utober.
Aiuc ala mprejes
La Jonta provinziela à fat ora de mëter su mo na categuria de mprejes cun i criteries al do per dé ora cuntribuc. Nchinamo fovel de pitla firmes, firmes mesanes cun 250 dependënc y de gran mprejes cun passa 750 dependënc. A mez ite fovel na gran pert che ne giapova nia n cont de finanziamënc direc. La categuria nueva arà l dërt de giapé n cuntribuc nchin a 20% de si custimënt che fossa l mez permez a la pitla firmes y la firmes mesanes. Deguna mudazion ne vëniel fat n cont de cuntribuc a la gran firmes, che possa me fé dumanda per proiec speziei de mesura straurdinera.
Valutazion de sculeies
La Jonta provinziela à dat pro che tla scoles elementeres y mesanes dëssel unì dat notes mpede valutazions. A chësta maniera vëniel jit pea cun la reforma a livel naziunel. Coche à lecurdà l presidënt Durnwalder iel vel ezezion: la notes jirà dal 4 al 10. Autramënter che tl’autra pert dla Talia dëssa tla Provinzia de Bulsan la materia religion valëi sciche materia de ublianza sce l ne ie nia unì fat na dumanda spezifica de esenzion. I nsenianc de religion puderà per chësta rejon fé pert dla cumiscion de scola. La notes per la materia religion unirà nce dates tla scoles autes y chiche ne arjonj nia l livel de basa, messerà fé do l ejam de setëmber. Tla scoles elementeres y mesanes uniral dat notes per uni materia y na valutazion generela ala fin. Canche l sculé fina la scola uniral dat na valutazion dla cumpetënzes, nia generel, cun referimënt a si pertes stersces y dëibles.
Televijion digitela
Cun la mudazion dla trasmiscion di programs de televijion tla Provinzia de Bulsan vëniel nce a se l dé do canai nueves. La Jonta provinziela à fat ora che sun chisc canai dëssel unì mandà ora, debant, la televijions tudësces „Bayerisches Fernsehn“ y „Kika“. Chësta segonda televijions mostra programs per mëndri. Tramedoi canai dëssa vester da udëi nchin ala fin de chësc ann.
Bilanz provinziel
Ntan che i assessëures provinziel ie tl lëur de anjenië l bilanz de previjion, iel unì dat pro de plu fonds sëuraprò. „La se trata tlo ndut de 52 milion de Euro, à spiegà Durnwalder, nsci ruva l bilanz dl 2010 a 5,182 miliardes de Euro. Chësc fossa me plu 250 milion de manco permez al ann dant. N aspieta ntant nce de pudëi mëter man cun la tratatives cun Roma n cont dla pert variabla y la reforma fischela. Per chësta rejon pudëssel nce unì a se l dé n bilanz de njonta de juni.
N cont de fonds sëuraprò iel unì dat pro 13 milion per lëures publics (10 per fé cuatieres mpede la casermes y 3 milions per lëures pra l Ciastel Badia). Per l’Università liedia de Bulsan iel unì juntà 3 milion ai 47 che fova bel unì udui danora. Mo 20 milion iel unì juntà per l trasport aspitan de ruvé a una cun la ferata RFI ulache l fova udù dant l finanziamënt de lëures per miuré scines y stazions baratan cun grunc. Al Chemun de Laives ie unì destinà 9 milion de plu (mpede 2 milion) per l zënter dal sport, sënta de training dl FC Südtirol.
La majera pert dl bilanz de previjion nuef ti va ala sanità cun 1,308 miliardes de Euro, 33 milons de plu permez al ann dant. „L custimënt dla sanità nstëssa ie per drët unì smendrì – à dit Durnwalder – ajache ëi se à nce sëurantëut dl custimënt che reverda di dependënc.
as
