Premiere dl film Parch Naturel Puez-Odles a S. Martin
USP – Feter 18 menuc dura l film sun l Parch Naturel Puez-Odles che unirà n vënderdi 16 de utober mustrà per l prim iede a San Martin de Tor. L assessëur Michl Laimer giaurirà la sëira de premiere dl film dal titul "Naturpark Puez-Geisler - Das Geschichtsbuch der Erde".
L parch naturel Puez-Odles, raion natuel sota defendura y ie pert dl patrimone mundiel Unesco. “L film mostra la truepa pertes de chësc parch y dëssa judé a miuré la cuscënza n cont dl valor de chësta cuntredes” dij Laimer. L raion defendù che mesura 10.200 hectar ie unì metù su dl 1978 y ngrandì dl 1999. L tol ite i chemuns de Funes, Urtijëi, S.Crestina, Sëlva, Corvara, Badia y S.Martin de Tor.
La particularità dl parch naturel ie l cuntrast danter la cuntreda cun l raion Puez-Gardenacia, che semea n raion sciche sun la luna cun la pizes dl Cir, la Odles y Putia cun i prei da mont curei da generazion a generazion. Me dinrer mostra n raion su tan de testemunianzes dl passà sciche tl cajo dl Parch Naturel Puez-Odles, per geologhes iel propi sciche n liber de storia sun nosta Tiera.
La pluralità dl parch naturel cun si testemunianzes geologiches à Hubert Schönegger tëut su y taià adum te n film. La produzion ie unida fata sun ncëria dl’Ufize provinziel per i parcs naturei cun sustëni dla Cassa dl Sparani y dla Rai de Bulsan. N vënderdi ai 16 de utober unirà l film mustrà dala 8 da sëira, per l prim iede tla sënta dl Istitut Culturel Ladin a San Martin.
as
