Jonta provinziela auza la chëuta turistica sun i segondi cuatieres
USP – La Jonta provinziela à te si senteda da ncuei (19 utober) dat pro de ulëi auzé la chëuta turistica sun i segondi cuatieres. Chësc ie un di ponc zentrei dla pruposta de lege finanziera per l ann 2010 che l presidënt Durnwalder à prejentà ala stampa do la senteda.
Pruposta de lege finanziera
La Jonta provinziela à dat pro la lege finanziera cun me articuli che reverda diretamënter l bilanz provinziel. “Ne ulon nia mo leprò vel lege omnibus, ajache chëles dal ann passa ne ie mo for nia unides dates pro te Cunsëi” à spiegà l presidënt Durnwalder. La majera nuvità reverda la chëuta sun i segondi cuatieres de patrons che ne à nia la residënza y se nuzea dl cuatier per la feries. La Jonta provinziel à udù dant che la basa de chësta chëuta vënie auzeda dl 50%. I chemuns giapa pona la puscibltà de auzé mo n iede chësta chëuta dl 100%. (Nchinamo pudova la Provinzia auzé la basa de 25% y i chemuns mo leprò dl 50%.) La chëuta turistica sun l segondo cuatier ne vel nia sce l cuatier vën adurvà per rejons de lëur. Tla lege finanziaria nueva à la Jonta tëut demez la chëuta IRAP, che fova bele unida smendrida a 0,42%. La chëuta IRAP resta purempò per la banches y assegurazions.
Ntendënza ala scola taliana
Te Jonta provinziela iel unì tëut a cunescënza che da pert dl guviern a Roma iel unì azetà la pruposta de Nicoletta Minei à sëurantò la ncëria da ntendënta ala scola taliana per la Provinzia de Bulsan. L Presidënt Durnwalder fajerà chisc dis l decret aldò.
TIS me a partezipazion publica
L zënter per l inuvazion TIS dëssa ruvé defin tla mans publiches. La Jonta provinziela à fat ora che la istituzions privates muessa vënder si pert y che la istituzions publics (Provinzia, Chemun de Bulsan y la Camera de cumerz) ebe la prezedënza a cumpré. “La provinzia dëssa dal 48% me ruvé nchin al 60%, l’autra pert dëssa ti jì al’autra istituzions publiches” à dit Luis Durnwalder.
Urbanistica dan suneria
Tl chemun de Riffian iel n luech da paur (stlut/geschlossener Hof) che ti ani à pudù unì trasfurmà te n hotel cun atività da paur. L patron à sëurandat si avëi ai mutons y un de chisc ulëssa me fé l paur y se damanda perchël de pudëi fé su mo na cësa per l’atività da paur. L Chemun se pera dan suneria y la Jonta provinziela à fat ora de se lascé ite te chësc cajo dan suneria y se mëter dala pert dl chemun. “N tel cajo iel bele stat tl Chemun da Ciastel ulache l chemun ne se à nia parà. Tlo vala de se paré acioche l ne devënte nia n segondo cajo de prezedënza” à dit l Presidënt dla Provinzia.
Istitut Fraunhofer a Bulsan
L istitut de inuvazion de gran inuem Frauenhofer cun 15.000 culaburadëures te dut Europa, uel giaurì na filiela a Bulsan y se à damandà na garanzia per n sustëni dala Provinzia. Davia che l se trata de n istitut de gran valor, à i assessëures provinziei segurà n cuntribut de 3,1 milon de Euro ntan i proscimi cater ani.
Reghister dla prutezion zevila
Uraganisazions de prim aiut che fej pert dl reghister dla prutezion zevila giapa n finanziamënt provinziel. La Jonta provinziela à dat pro n regulamënt nuef per l’urgnisazions sciche i destudafuech, judacrëp o prim aiut che ulëssa unì tëutes su te chësc reghister. I criteries de majera mpurtanza ie l avëi almanca 50 cumëmbri, avëi na sënta te cater di nuef raions di destudafuech y de avëi na urganisazion adateda.
Cuntribuc per la furmazion
La Provinzia de Bulsan possa dé inant 929.000 Euro che vën da Roma per la furmazion. Istituzions possa fé dumanda per giapé n finanziamënt nchin a 80% de si programes de furmazion. La sëida per uni istitzion ie de 100.000 Euro.
Doi zircunvalazions nueves
La Jonta provinziela à dat pro n custimënt de 8 nchin 9 milion de Euro per la zicunvalazion de Sand in Taufers. Per la streda de zircunvalazin de Tarsch tla Val Venuesta ie unì dat pro n custimënt de 15 milion de Euro.
Unificazion tl spedel de Bulsan
La sezions de chirurgia 1 y 2 dl spedel de Bulsan unirà metudes adum y avrà deberieda 80 liec. Chësta idea fova bele unida fata al savëi l’ann passà de mei, sën iela unida ufizialiseda.
Chemuns de Perbian y Terenten
Ai cunsëies di chemuns de Perbian y Terenten ti iel unì tëut la ncëria davia che ie mort l ambolt. Nchin ala veldes dl ansciuda che vën (bonamënter ai 16 de mei) dëssa i vizeambolc ji inant cun l'aministrazion ordinaria.
as
Galaria dales fotografies
Durnwalder sulla legge finanziaria
- Scarica il file audio 515 kb
