Referendum provinziei: l quorum dl 40% ne ie nia unì arjont
USP - L quorum dl 40% ne ie nia unì arjont pra i referendum provinziei. Canche l ie unì stlut la sezions de vela dala diesc da sëira, ie n media 37,98% di zitadins stai a lité. La cin prupostes de lege ne ie a chësta maniera nia unides azetedes dala populazion, la regules ne vën nia mudedes.
Ti ot chemuns ladins à i zitadins mustrà manco nteres de vela permez a duta la Provinzia de Bulsan. Sce n fej la media di cin referendum iel tla Val Badia y Gherdëina stat 35,27% che ie jic a lité. La majera cumpëida iel stat a Urtijëi ulache l 45,8% à lità l referendum dl aeroport. La mëndra perzentuela dla doi valedes ladines ie unida cumpededa a Corvara cun 29,3%.
I doi majeri raions de vela, chël de Bulsan y dl Burggrafenamt, ie i sëui ulache l ne iel nia unì arjont l quorum dl 40%. (Chisc doi raions à deberieda, cun 153.837 litadëures, nce feter 40% dla populazion.) Tla val Venuesta iel stat 45,8% che ie stai a lité.
Te duta la Provinzia de Bulsan ie unì arjont chësta perzentueles.
37,9 percënt à lità l referendum per l frabiché cuatieres. L referendum per regulamenté da nuef i segondi cuatieres à lità 37,9 percënt, la pruposta di gran proiec à lità 37,8, chëla dla democrazia direta 38,1 percënt y 38,2 percënt ie jic al referendum per via dl aeroport.
Nchin che la cumiscion de vela ne à nia ufizialisà chësta zifres, se tratel de nfurmazions mo nia ufizieles.
Duta la zifres n cont dl referendum provinziel ie da abiné tl internet sun la plata www.wahlen.provinz.bz.it
as
