Zircunvalazion de S. Crestina sareda per i dlandri nueves
USP – Da ncuei, lunesc 26 de utober, vëniel sarà la zircunvalazion de S. Crestina per pudëi mëter su i dlandri di doi majeri puenc. Per via de chisc lëures vën l muvimënt di auti avisà ora per cater enes, ntan la duta la 24 ëura, sun la vedla streda prinzipela de S.Crestina.
La streda de zircunvalazion nueva à bele ntan l instà tëut demez truep muvimënt de auti y mesuns pesoc dal zënter de S.Crestina. Acioche la zircunvalazion giape nce n bel cialé ora vëniel sun l puent dala raida dl Greva nchin da Artic (puent de 73 metri) y sun l puent da Ruacia (puent de 57 metri) metù dlandri da na nota architetonica.
I lëures vën scumencei n’ena dant che n ova calculà ajache i dlandri ie bele anjeniei. “Sce la nes buta cun l tëmp y la nëif sperons de finé mo dan la cater enes” spiega l ing. Georg Fischnaller.
I dlandri ie uni fai do n proiet artchitetonich che ova venciù n cuncors provinziel. L urientamënt dl’opra architetonica vën dala cuntreda. La carateristiches de chësc raion dëssa se spidlé ti dlandri di puenc y tl medemo mumënt dëssi nce ti dé ai puenc pesoc n cialé ora plu lesier. Doi architec jëuni à ulù abiné n balanz danter elemënc da cësa - chëi dla cuntreda, y elemënc nueves. I dlandri de culëur d’or spidla l linëus dl surëdl y fej a chësta maniera referimënt al culëur cueciun (la nrosadura) che la Dolomites giapa da sëira. Aldò dl linëus che muda ntan l di spidla i dlandri nce n autra tonalità de culëur.
Sun i doi gran puenc vëniel fat dlandri de acel inox laurà a de plu manieres.
Tl proiet de David Stuflesser y Nadia Moroder iel nce udù dant la luminazion di dlandri. L linëus dëssa unì fat cun mesura y la streda nstëssa dëssa unì lumineda tres i dlandri.
Aldò de prima cumpëides dl muvimënt sun la streda de zircunvalazion nueva iel de agost unì cumpedá nchin a 5.581 mesuns al di. De setëmber ie la media al di stata de 3.845 mesuns de trasport.
as
