Aministraziun | 26.10.2009 | 15:15

Jonta provinziela dl 26 de utober

USP – La Jonta provinziela de Bulsan à te si senteda de (ncuei) lunesc 26 de utober tëut a cunescënza i resultac di referendum dijan de ulëi se dé ju cun i argumënc nce sce la populazion ne à nia azetà a maiuranza la prupostes de lege. I argumënc plu mpurtanc ora dla senteda dla Jonta che l presidënt à prejentà ala stampa reverda l tunel de basa dl prëner y la pruposta de lege per imigrei.

Referendum provinziei

L presidënt Durnwalder à dit che l ie segur che i argumënc di referendum (che ne ie nia passei) unirà mpomo tratei dala Jonta provinziela y che l unirà fat mudazions. “L ie nce debujën de stlarì la lege sun l referendum nstës, per ejëmpl cie che reverda la cumpatibltà cun la costituzion. Chësc ne uel nia di che l vën mudà l quorum, la cumpëida minima acioche i resultac dl referendum vel” à dit l presidënt. Aldò de lege ne possel sën per 5 ani nia unì fat n referendum cun i medemi cuntenuc. Aldò dla nterpretazion de Durnwalder curespuend la media de 110.430 zitadins che tl referendum à lità de scì a 28,3% dla populazion.

Furtificazion de Furtëza

Do che fina via la mostra interregiunela dëssa la furtificazion de Furtëza unì adateda per pité luegia adateda al zënter de nfurmazion dl tunel dl prëner. Leprò dëssa nce l zënter de usservazion ambientela giapé lerch tla furtificazion.

Pruvedimënc ambientei per l tunel

De majeri proiec sciche l tunel dl prëner muessa paië ite 47 milions de Euro per sustenì pruvedimënc ambientei. La Jonta à dat pro na lista de pruvedimënc che unirà dantaprima fai tla Val de Isarch.

Lege sun l’imigrazion

Te Jonta provinziela iel unì metù man la descuscion per via dla pruposta de lege sun l’imigrazion. “Tlo saral debujën de plu sentedes per ruvé a una, ma feji cont che per la fin de nuvëmber messessela vester tan inant” à dit Durnwalder. La se trata tlo dantaprima de tré adum duta la delibres che ie bele unides fates te na sëula lege. I argumënc prinzipei reverda la cumpëides lascedes pro, i servijes soziei, i cuatieres, mparé la rujenedes y la scola.

Aiuc a urganisazions de prim aiut

L’ena passeda ova i assessëures provinziei dat pro criteries acioche urganisazions ulenteres possa unì tëutes su tl reghister dla prutezion zevila y nsci giape cuntribuc. Chëst ena iel bele unì fat la prima cunvenzions cun la Crëusc Blancia per si servisc de assistënza (150.000 Euro) y cun l servisc de prim aiut tl’ega (60.000 Euro).

Balanzé servijes dla cëses de paussa

Tla cëses de paussa y zëntri per demenza dla Provinzia de Bulsan iel cundizions scialdi desvalives n cont de servijes y priejes. La Jonta provinziela à fat ora che chisc dëssa te tëmp de cin ani unì adatei y balanzei ora. Chësc ie debujën acioche tla cëses y i ti zëntri vëniel pità i medemi servijes ala medema cundizions. Al mumënt iela nscila che la Provinzia valivea ora la defrënzia de custimënt paian da 1,50 a 23,83 Euro a persona. Tla delibra iel sëuraprò nce na lingia de pruvedimënc per svilupé y miuré la cures.

Tribuc per radio y televijion

La stazions de radio y televijion muessa paië n tibut per se nuzé dl antenes de trasmiscion. La Jonta provinziela à fat ora de lascé do 50% de chisc tribuc per la stazions che manda ora la nfurmazions dla prutezion zevila.

Cater canai de televijon nueves

Tres la sozietà RAS uel la Jonta provinziela anjenië doi frecuenzes televijives nueves y nscì cater canai sëuraprò. L custimënt udù danora ie de ferter 3,5 milon de Euro. Ncuei à la Jonta provinzela dat pro na prima pert de una milion de Euro per pudëi scumencé.