A una per l finanziamënt di chemuns tl 2010
USP – Feter 516 milion de Euro destinea la Provinzia de Bulsan per finanzië i chemuns tl ann 2010. Chësta ie (ncuei) 27 de utober stata la basa dla tratatives danter la Provinzia cun si presidënt Durnwalder y reprejentanc dl Cunsorz di chemuns. N majer pëis à abù l bujën de judé pea a sparanië. Ai chemuns ladins uniral metù a desposizion 308.000 Euro per l lëur sëuraprò cun la trëi rujenedes.
Nce per l ann 2010 unirà l 13,5% dla chëutes dat inant ai chemuns per curì si custimënc. “Ma la reduzion dla ntredes per via dla crisa economica cumporta nce l avëi manco scioldi a desposizion per l’aministrazions” à dit l presidënt dla Provinzia. De ndut fajerà l finanziamënt per i Chemuns tl ann che vën ora 516,5 milion de Euro. N cont de spartì su chisc scioldi iesen tl’ancunteda tla cësa provinziela Widmann ruvei a una de auzé dl 1,5% la cuota per zitadin. Leprò vën mo 80 milion de Euro ora dl fond de rotazion per nvestimënc di chemuns te lëures publics: 35 milion de Euro per frabiché scoles, 10 milion per frabiché scolines, 20 milion per cëses de paussa, canalisazions y roles dal’ega, 15 milion per d’autra nfrastrutures.
“Dal fond de rotazion vëniel mprestà ca scioldi per vint ani che possa unì adurvei per scoles, cëses de paussa o canalisazions. I chemuns paia de reviers 2,5% al ann a na maniera che de ndut muessi me plu paië de reviers mez l custimënt di lëures fai” à spiegà Luis Durnwalder. Per scolines iel da paië de reviers 4% al ann y 5% per d’autra nfrastrutures. Tl’ancunteda cun i ambolc iesen nce ruvei a una sun l finanziamënt dla stredes per la rodes: cater milion de Euro unirà dal fond per i chemuns y d’autri 6 milion de Euro dajerà la Provinzia mo sëuraprò.
Per finanzië lëures publics straurdineres che i chemuns ne ti ie nia dassëui, iel aldò dla lege provinziela 27 dl 1975 a desposizion 64 milion de Euro. Per judé a paië ju debic possa i chemuns fé cont cun de ndut 74,5 milion de Euro.
La schiza de finanziamënt per i chemuns tl 2010 unirà sën dat inant ai chemuns che dëssa ti dé l bënsté y pona uniral permò sotscrì da pert dla Provinzia y Cunsorz di Chemuns.
as
