“Rujenedes al cunfin”; n vënderdi ai 6 a Bulsan
USP – “Pudonsa cun l aiut dla rujenedes arjonjer d’autra cultures o ie pa la defrënta rujenedes na sëida? Defrënta rujenedes cun defrënta mpurtanzes? Giaurì nosta identità à d’autra grupes de rujeneda?” N vënderdi ai 6 de nuvëmber dajerà i prufessëures Tullio De Mauro y Hans Goebel nce respostes a chësta dumandes. L Istitut Ladin „Micurà de Rü“ y l Assessorat provinziel ala Cultura Ladina nvieia dala 17.00 tl Palais Widmann a Bulsan.
L Sudtirol ie n luech de ancunteda de rujenedes y cultures defrëntes. Tenian cont y respetan un cun l auter la defrënzes danter la rujenedes iel truep ponc ulache n possa se ancunté.
L ne n’ie nia mé una na vijion, un n pont de ududa dl mond, y la gran varietà de rujenedes nes l desmostra. Canche l „auter“ ie udù sciche n pericul per nosta ntegrità possa i cunfins linguistics fermenté te nëus laite – y nsci dé vita a n rëm a chël che l ne n’ie nia mesun ti vester. Datrai crësc pona nce la tëma che l „auter“ pudëssa vester n pericul per mi identità. Y canche n vëij tl „auter“ dantaldut la desfrënzes, pona crësc la destanzes a uedl udan. L suzed che n valguna rujenedes ne n’ie dant o do dut ntëur nia plu bones de spieghé l mond te chël che vivon. L semea che mé l nglëisc sibe bon de jì a pën cun i tëmps.
- Ie pa chësta la rujeneda che nes fej sentì a cësa sun dut l mond: la tle universela?
- Ie pa n valguna rujenedes plu mpurtantes de autres?
- Saral pa tl daunì na valivazion dla rujenedes, o arà pa rujenedes singules mo na rejon de vester?
N vënderdi, 6 de nuvëmber, uniral a Bulsan jit ancontra ala tematica da doi ponc de ududa defrënc: da nord y da sud. Per rujené deberieda dla mplicazions sociolinguistiches de chësta nosta realtà, an nvià ite doi linguisć recunesciui: Tullio De Mauro y Hans Goebl. Danora rujenerà per i urganisadëures, l assessëur provinziel Florian Mussner y l presidënt dl Istitut Ladin Hugo Valentin.
Tullio De Mauro
nasciù a Torre Annunziata (Napoli). Ël se dà ju cun linguistica taliana, sociolinguistica y cun problematiches educatives y scolastiches che à da nfé cun la rujeneda. Ël à nsenià ala Sapienza de Roma dal 1974 al 2007 sciche prufessëur de filosofia dla rujeneda y linguistica generela.
Sculeies y cumpanies de Trënt y Cosenza à laurà ora n portal cun truepa nfurmazions biobibliografiches: www.tulliodemauro.com
Hans Goebl
nasciù a Viena tl 1943.
L ie professëur de linguistica franzëusa y taliana tl dipartimënt de Romanistica dl’Università de Salzburg. Ël ie a cë dl proiet „Atlante linguistico del ladino dolomitico e dei dialetti limitrofi“ (ALD I y II). Goebl lëura deberieda ai Istituc Ladins „Micurà de Rü“ y „majon di fascegn“. L fej pert dl cumité scientifich y dl cumité de redazion dla revista „Ladinia“, data ora dal Istitut Ladin de San Martin de Tor. Si portal ie: www.sbg.ac.at/rom/people/prof/goebl/goebl.htm
as
