Diretëures dla Ladinia tla scoles de sëuramont
USP – La culaburazion danter la scoles ladines dla Provinzia de Bulsan y la scoles de Fedom y Ampëz dëssa unì renfurzeda. Cun chësta idea à na delegazion dla Scola ladina dla Provinzia de Bulsan deberieda cun na reprejentanta de Fascia vijità la scoles de Fedom y de Ampëz.
A Reba de Fedom iesen jic a ti cialé ala scolina y a La Pli ala scola mesana. N à pudù udëi che l vën fat ativiteies nteressantes nce per ladin, scebën che la normativa dl post ne vëij nia danora n nseniamënt curriculer dla rujeneda ladina. Daldò iesen furnei via n Ampëz a ti cialé ala scola d’ert, cun chëla che n à bele metù a jì n valgun proiec deberieda ti ani passei, danter l’auter tl cheder dl program “Scuntrart”. Domesdì iel mo stat na ancunteda cun reprejentanc dla Regules de Anpezo che à purtà dant si statuc y si lëur per mantenì la cuntreda y l ambient local.
A saludé i reprejentanc dla scoles ladines iel stata la Assessëura dla Provinzia de Belun Daniela Templari y la Presidënta dla Union Generela dla Dolomites Elsa Zardini cun na delegazion dl post. Cun na vijita ala bela Pinacoteca “Rimoldi” ie la ancunteda fineda via, tla speranza che la culaburazion posse unì renfurzeda tl nteres de duta la jënt de nosta valedes.
Dla delegazion à fat pert L ntendënt Roland Verra, la sëurastanta dla scoles de Fascia Mirella Florian, l diretëur de Repartizion Alexander Prinoth, l diretëur dl IPL Theodor Rifesser, l’ispetëures Edith Ploner y Rosmarie Crazzolara, l prufessëur de Università de Ladinistica Paul Videsott y i diretëures dla scolines y dla scoles ladines dla Provinzia de Bulsan.
as
