Mussner: tenion su nosc simboi de religion
USP - L assessëur provinziel Mussner se mostra sdenià per via dla sentënza dla Chëurt Europeica per dërc dla persona aldò de chëla che n ne possa nia plu taché crisc’ tla tlasses de scola. La ravises cristianes ie – nsci Mussner – de gran valor per l sistem de furmazion y educazion.
„Nchinamo ons tla Provinzia de Bulsan pudù abiné de bona soluzions che rënfurzea l valor dla ravises cristianes y che anconta y tol su d’autra cultures y religions“ dij l assessëur Florian Mussner. Interculturalità y n se giaurì culturalmënter ne possa nia ulëi di strité ju la tradizions y i valores che n à nstësc. Dala cumenanza multiculturela nes aspitons respet dan a nosc simboi de religion, sciche l crist, la crëusc o d’autri simbol che ie te nosta scolines y scoles. La crist ie nce n simbol culturel, che ie da abiné te majera pert dla cëses dla valedes ladines y che cumpanieia i mëndri da pitli insù. „Ie jissi inant nchin al’ultima suneria per defënder chësc dërt de mustré su i simboi de religion“ sorissea l assessëur ala scola ladina Mussner. La posizion dl Cristianesim per l’identità dl’Europa y dla Provinzia de Bulsan ne possa nia unì striteda ju.
as
Galaria dales fotografies
Mussner: N se giaurì culturalmënter ne possa nia ulëi di strité ju la tradizions sciche l simbol dl crist te scola. (foto USP)
