Cataster plu avisa: prejentazion a Urtijëi
USP – I documënc dl cataster fai dan 160 ani cun mesuns scëmpli y mantenì tres doi vieres, ne possa nia plu tenì pea cun i tëmps n cont de vester avisa. La repartizion provinziela de cumpetënza à svilupà n sistem fé la documentazion plu avisa zënza n gran mpëni. Chësc sistem unirà prejentà n juebia che vën, 12 nuvëmber, a Urtijëi.
Ntëur l 1850 ie unì metù man de fé i dëssenies dl cataster che se à mantenì 150 ani sun papier nchin a ncuei. Ti ani 90 iel pona unì digitalisà chisc dëssenies che ie deventei mo manco avisa. Aldidancuei muessen fé cont che i dëssenies ruva me nchin a 5 metri de defrënza dala sëides reéles. “Son te na situazion stramba che la nfurmazions che jon a se tò cun mesuns modernes muessa unì desseniedes ite te chertes che ne ie nia avisa” spiega l diretëur de repartizion per l Liber fundier, Klaus Gänsbacher.
La repartizion provinziela à lascià svilupé n program de computer che tol la mesures tëutes ju drët avisa y i ponc de referimënt drët avisa per pusizioné da nuef i documënc de cataster. “Fé da nuef i dëssenies fossa n gran custimënt, cun l sistem nuef bastel puecia mesurazions per miuré i dëssenies a na maniera che i fala tl piec cajo me plu doi metri dala realtà” nsci l assessëur Hans Berger.
L proiet pilot tl Chemun de Urtijëi y de Frag à bele purtà de bon resultac. L proscimo var sarà chël de jì inant te duta la Provinzia de Bulsan. Mo dant vën l proiet per miuré i dëssenies dl cataster prejentà ala grupes de lëur nteressedes deberieda cun l assessëur Berger. Chësc sarà
n juebia 12 de nuvëmber
dala 15.30
tla Cësa de cultura de Urtijëi.
as
