Oswald von Wolkenstein y la Ladinia
USP - Sciche ciavalier, uem dl’aventura y ël de vita iel jit ncantëur tl mond dl medieve, sciche cianzunier se al pona fat gran inuem: Oswald von Wolkenstein. Chisc dis vëniel tl Ciastel Tirol, sëura Maran tenì n simposium cun esperc de inuem nternaziunel sun Oswald von Wolkenstein. N sada ai 7 de nuvëmber uniral tratà l raport danter l poet cunesciù y la Ladinia.
Pra l simposium „Oswald von Wolkenstein- Leben-Werk-Rezeption“ traterà l Ntendënt dla scoles ladines Roland Verra dla paroles ladines che n possa abiné te vel scrit de Oswald von Wolkenstein y coche l ie unì tëut su l poet dai Ladins, tla leteratura, tl’ ert y tla lijënda. Te chësc ntervënt uniral nce tratà la posizion de Oswald tl imaginer coletif de nosta jënt. L unirà mplu nce rujenà dla mpurtanza de Oswald per i Ladins de aldidancuei, scebën che si figura ne sibe tla Ladinia mo nia unida tëuta su defin te si gran mpurtanza per la storia dla cultura nia mé de nosc raion.
L referat Oswald von Wolkenstein y la Ladinia“ n sada 7 de nuvëmber, scumëncia dala 9.00 danmesdì. L simposium ie metù a jì dal Museum provinziel per cultura y storia deberieda cun l zënter per studi dl medieve dl’Università de Salzburg.
as
