Cuotes dal lat’: ncuei prima dumandes tla Val Badia
USP – Per l sëurandé dla cuotes dal lat à la repartizion provinziela per l lëur da paur vel nuvità. Per pudëi mantenì la cuotes saral me pu debujën de avëi l 85% mpede 90% sciche l ie stat nchin sën. Sciche basa dla dumandes vel i dac dl sistem de nfurmazion per lëur da paur LAFIS. Ncuei, 9 de nuvëmber vëniel tla Val Badia scumencià a pië do la dumandes sun l post.
La dumandes per la cutes dla lat possa unì dates ju de persona ai culaburadëures provinziei che vën ntan l mëns de nuvëmber ti luesc. Chësc servisc scumëncia ncuei, lunesc 9 de nuvëmber tla Val Badia. A San Martin de Tor possa i paures jì dala doi ala trëi domesdì tl magasin di destudafuech, a Al Plan de Mareo iel bele danmesdì, dala 10 ala 11 chësta puscibltà tla sala dl Cunsëi de Chemun.
Nchin ai 4 de dezëmber possa la dumandes per la cuotes dla lat nce unides dates ju diretamënter tl Ufize provinziel per zidlamënt de bestiam, tla streda Brenner 6 a Bulsan (dala 9 ala 12 danmesdì). La cuotes nueves unirà pona sëurandates ai prim de auril dl ann che vën. Per pudëi mantenì la medema cumpëida de cuotes dal lat, muessel tla sajon de referimënt 2010/11 nce unì dat ju almanco l 85%. Ti ani passei fovel 90%. Sce l ne vën nia arjont la perzentuela, vën la cuota smendrida ala cuantità che n à veramënter arjont.
La basa per sëurandé la cuotes dla lat pieta i dac dl sistem LAFIS. Duc i paures muessa vester nutei su te chëst sistem de nfurmazion. La grandëza dla puscion vën me tëuta n cunsciderazion aldò de chësc sistem. Sce n luech da paur ne ie nia tl sistem o sce la mesures ie unides mudedes, muessel dan fé la dumanda per la cuotes, unì metù a post la nfurmazions dl sistem LAFIS.
Do che la cuotes ie unides sëurandates, ne posseles te tëmp de trëi ani nia unì dates inant a n auter prudutëur. Chësc ne vel nia sce l luech vën sëurandat al uem/ala fëna o parënc nchin al cuarto grado de parentela.
as
