Tisl nuef: julantin cun nfurmazions mpurtantes
USP – Cie ie pa l tisl nuef? Ciuldì ti vëniel pa dit l tisl di purciei? Co se tachen pa chësc tisl? Ciuni ie pa i sintoms? Co possen pa se defënder? La respostes a duta chësta dumandes possen giapé da n julantin dat ora dal Departimënt provinziel per la sanità che ie da giapé te de plu lueges.
L vën rujenà truep dl tisl nuef y l bujën de nfurmazion ie mo grant. “L virus se slergia ora debota, l ie perchël mpurtant a savëi de cie che la se trata pra chësta malatia y co che n possa se defënder”, sorissea l assessëur ala sanità Theiner. Si departimënt à trat adum la nfurmazions plu mpurtantes te na publicazion che da nfurmazion sun co che n ie unic sëura de chësc tisl y sun si svilup.
Spiegà vën nce i sintoms dl tisl-A. L tisl A/H1N1 scumëncia cun na fiëura sterscia che vën te n iede, mel de cë, se n sté mel, sué, frëic, sensazion de deblëza. Leprò vën l se stenté de tré l fla per via de tos, mel de col o per l nes strupà. Tl julantin vëniel nce spiegà che n se taca l virus da persona a persona tres gotes (nsci a tussì, straduné o a vester daujin a rujené) o ndiretamënter tres gotes dates sëura sun cosses, che n se tlopa su.
Nce per chësta rejon ie la igiena de majera mpurtanza per se defënder dal tisl nuef. Plu iedesc al di dëssen se lavé la mans, tussì o straduné te n fazulët de papier y for inò lascé ite aria frëscia ti locai.
Tla publicazion iel nce mustrà su coche n dëssa se astilé sce n se ntënd de sintoms: la se trata n iede de se tò la respunsabltà permez a d’autri, sté a cësa y curé la malatia nchin che n ie inò varì. Sce i sintoms devënta pieces, dëssen se mëter n cuntat cun n dutor. Tl julantin vëniel metù a cuer de nia jì me nsci dal dutor o tl spedel, ajache n pudëssa ti taché l tisl a d’autri.
Tl julantin abinen nce nfurmazions n cont dla dlaveies che vën fates te de plu pertes. L julantin sun l tisl A/H1N1 ie da giapé dai dutores, pra i Servijes saniteres, apoteches y ti chemuns.
as
