Nce n auter ann l Abo60+ debant per seniores
USP – Nce sce la va de sparanië, giaperà la jënt de tëmp nce n auter ann l abunamënt Abo60+ debant. Chësc reverda duc i zitadins dla Provinzia de Bulsan che n auter ann arjonj i 70 ani. Ëi possa se damandé l abunamënt per furnì debant cun i mesuns publics tres n formuler che ti vën chisc dis manda duc i nasciui l ann 1940.
Dal instà dl ann passà vëniel pità n abunamënt per duc i zitadins sëura i 60 ani. Chëi che ie danter i 60 y 70 ani paia 100 Euro per l abunamënt per furné dut l ann cun la ferata regiunela nchin a Trënt (senià ti orars cun “R”), curieres y la furnadoies de Meransen, Renon, Jenesien, Mölten, Vöran y la ferata sun l Renon y sun la Mendula. Chi che ie sëura i 70 ani giapa l abunamënt Abo60+ debant.
“Che chësc abunamënt ie stat na bona cossa testemunieia nce la gran resposta che on giapà” dij l assessëur ala mubilità Widmann. Da canche l ie unì nvià via chësc abunamënt iel unì dat ora feter 50.000 abunamënc debant y feter 5000 a 100 Euro. A chëi danter 60 y 70 ti vëniel nce pità l abunamënt a na linea per n miëur priesc.
L fin dl abunamënt Abo60+ ie chël de ti pité ala jënt de tëmp i mesuns de trasport publich a na maniera plu saurida. Da una pert possa i seniores furné a miëur priesc o nchinamei debant cun la curiera y la ferata, dal’autra pert ie la cherta drët scëmpla da adurvé ajache n muessa me l avëi pea, n ne adrova nianca dala timbré.
L Abo60+ possen se damandé cun n formuler. Chësc ie da giapé ulache l vën vendù la chertes o nce tl internet sota www.sii.bz.it
Nfurmazions plu avisa giaten nce al numer de servisc per la mubilità 840 000 471.
as
