Frabiché | 15.02.2010 | 11:40

Nuviteies per sëurandé lëures publics

USP – La nuviteies plu mpurtantes n cont dla lege provinziela adateda al normes stateles y europees per sëurandé lëures publics, deberieda cun i pruvedimënc per manco burocrazia, à l assessëur Florian Mussner purtà dant te n cunvëni a Bulsan. “I adatamënc ne porta nia me svantajes ajache sun dut l raion naziunel iel da tenì ite la regules nueves per la cualificazion de firmes, scrì ora y sëurandé i lëures” à sorissà Mussner ai 12 de fauré tl’Academia Europeica.

Smëndrì burocrazia ie aldò dl assessëur Mussner un di fins plu mpurtanc dl dipartimënt ai lëures publics. La ne se trata tlo nia me de schivé papier y pité l servisc online, ma nce de scemplifiché normes y la lege per ti unì ancontra ai zitadins. “La lege provinziela per l frabiché ne vën nia tëuta ju defin, ma me chëla pert che reverda l sëurandé de lëures, servijes y l mené adalerch vën tëuta demez” à spiegà Mussner n cont di adatamënc ala normes stateles. Ulon arjonjer n’adurvanza unitera dla normes do l “Còdesc di cuntrac” da pert dla Provinzia y duta l’autra istituzions publiches. Mo de fauré dëssa la documentazion aldò ruvé tl internet.
Vantajes porta aldò de Mussner la regules uniteres a livel de stat per la cualificazion de firmes, i criteries per scrì ora y sëurandé i lëures. “Nce nosta firmes possa a chësta maniera fé pea plu saurì ai cuncorsc oradecà y mplu iel plu segurëza de dërt” à dit l assessëur ai lëures publics. “La garanzia dla bona cualità dl lëur vën mantenida te chëla normes che vëija dant de sëurandé i lëures a chiche pieta l miëur priesc” à sorissà Mussner. La proietazion de majeri lëures plu cumplesc unirà nce tl daunì sëurandata tres cuncors.

Lëures nchin a 40.000 euro, mené adalerch y servijes nchin a 20.000 euro possa unì sëurandai diretamënter. Per sëurandé lëures danter 40.000 y 100.000 euro muessel unì damandà almanco trëi pitedes. Sce l se trata de lëures danter 100.000 y 500.000 euro o servijes nteletuei danter 20.000 y 10.000 euro, uelel vester almanco cin pitedes. L muessa unì fat al savëi sce l vën scrit ora lëures sëura 500.000 euro, servijes sëura 20.000 euro y lëures de cë sëura 100.000 euro. Aldò dl diretëur dl Ufize provinziel cumpetënt, Georg Tengler muessel unì cunedì chisc lëures sun la plata internet de chi che sëurandà i lëures, dl servisc de usservazion per cuntrac publics, l Minister per nfrastrutures y pra la leges de stato. Mplu sun almanco doi zaites provinzieles y stateles da uni di. Tla gazëta ufiziela dla Union Europea muessel unì publicà cuncorsc per lëures sëura 4,845 milion de euro y servijes sëura 193.000 euro. L paië ora dla contes sun via eletronica ie bele dal prim de jené deventà de ublianza.

Al mumënt possa i lëures me unì scrì ora te n pachetl dut adum. “Tres na norma nueva ulons fé a na maniera che n possa spartì i lëures do mestieres tenian purempò for cont dla regules de publicazion y de finanziamënt” à dit Mussner.
La diretëura di aucac provinziei Renata von Guggenberg à mo sorissà che nce la Provinzia muessa se tenì al normes stateles y europees. N à purvà a se fé valëi cumpetënzes te chësc ciamp, ma sentënzes te de tei caji mostra su che la Provinzia ne à nia la cumpetënza aldò.

Per via dl gran nteres mët l Assessorat provinziel ai lëures publics a jì mo na manifestazion de nfurmazion, n merdi ai 23 de fauré, dala trëi domesdì tl’Academia Europeica a Bulsan.