Politica | 15.03.2010 | 15:02

Jonta provinziela: lauré ora l’acurdanza finanziera cun Roma

USP – Te si senteda da ncuei (15 merz) à la Jonta provinziela tratà cuestions dl’acurdanza finanziera cun l Guviern de Roma che muessa unì marciadedes ajache l uel vester na norma de atuazion. Danter i cin ponc zentrei ie i cuntroi dla Guardia di Finanza, cuntroi statei sun ativiteies provinzieles y la perjon de Bulsan. Do senteda dla Jonta à l presidënt Durnwalder nce prejentà la dezijions n cont dl program per culegamënc internet y dl zënter de nfurmazion dl tunel dl Prëner.

Cin ponc da stlarì a Roma

La Jonta provinziela ti pieta al Minister dla finanzes na culaburazion per coordiné i cuntroi dla Guardia di Finanza tla provinzia de Bulsan. “Ulon arjonjer n’autra maniera de fé i cuntroi. L dëssa unì cialà do i cuntenuc, no sce l ie unì fat fai de forma” à dit Durnwalder. Sciche ejëmpli iel unì nunzià l Deutschland ulache i cuntroi vën fai al savëi danora a na maniera che la firma possa anjenië ca di documënc. Da pert provinziela uniral śën anjenià ca chësta pruposta y rujenà cun reprejentanc dl’economia y di sindacac. Dan jì a Roma uelen nce se mëter a una cun Trënt per jì inant deberieda.

Pert dl’acurdanza finanziera danter Stat y Provinzia ie nce l sustëni soziel. La pert operativa n cont di pruvedimënc y cuntribuc soziei pudëssa jì tres l INPS. Tla Provinzia se njinien per n’acurdanza de chësc vies cun l Stat.

La Jonta provinziela ie a una cun l Stat che i criteries de stabilità economica muessa unì respetei. Nia a una ne iesen de giapé metù dant te ciun ciamps che l possa unì auzà o smëndrì la nvestizions. “Nëus ulon nstës pudëi di ulà sparanië, perchël dëssa la cunvenzion de stabilità nia scrì dant capituli, ma l saldo dëssa vester la fundamënta de stabilità” à dit l Presidënt dla Provinzia.

Aldò l’acurdanza cun l Guviern dëssa la Provinzia sëurantò dala Chëurt di conc i cuntroi ala Istituzions che depënd dala Provinzia o cun finanziamënt provinziel, sciche per ejëmpl i chemuns, l’università, la Camera de Cumerz o l IPES. Chësc pont muessa unì stlarì danter Provinzia y Chëurt di conc, fajan ora i particuleres n cont de cuntroi y che la Provinzia debe inant la nfurmazion ala Chëurt di conc.

Cun l Guviern de Roma iel unì fat ora che la Provinzia giapa cumpetënzes nueves spendan ite 100 milion de euro. “Segur iel me i 40 milion per i chemuns de sëida. Mo da fé ora plu avisa ie i autri ciamps sciche l finanziamënt per l’università, l conservatorio de mujiga, la RAI tudëscia y ladina a Bulsan, la Posta y pruvedimënc soziei. Danter chisc pruvedimënc soziei iel nce l frabiché da nuef dla perjon a Bulsan. “L Stat dajëssa la puscion y la Provinzia judëssa a frabiché la perjon” à spiegà Durnwalder.

Culegamënc internet

Nchin ala fin dl ann passà à la Provinzia njenià i culegamënc internet per arjonjer 85% dla populazion y la firmes cun passa trëi culaburadëures. Davia che truep culegamënc ie via ondes radio à la Jonta provinziela dat pro n nvestimënt de 4 milion per cabli a fibra otica. Tl program iel nce l culegamënt San Martin – Longiarù y San Laurënz – La ila. L unirà pona nce scrit ora lëures per l culegamënt Longega-Al Plan.

Reforma dla scola auta

Do che la lege statela per la reforma dla scola auta ie n dorva, à la Provinzia mo 6 mënsc a desposizion per l’adaté ala situazion provinziela. Davia che la lege ne ie mo nia firmeda dal Presidënt dla Republica, ne ti la fejen a Bulsan nia al’adaté nchin d’instà. Per chësta rejon se damanden śën ufizialmënter de pudëi spënjer la reforma dla scola auta tl Südtirol al ann de scola 2011/12. “I adatamënc messëssa perdrët me unì fai per la scoles tudësces y ladines, ma nëus ulon a sëula reforma per duta trëi grupes de rujeneda” à sorissà Durnwalder.

Furtin de Furtëza

L zënter de nfurmazion per l tunel de basa dl Prëner dëssa giapé lerch tl Furtin a Furtëza. La Provinzia finanzierà i lëures de adatamënt per n custimënt de feter 2 milion de euro. La Sozietà dl tunel tl Prëner paierà l cuntenut dl zënter de nfurmazion per 600.000 euro.

Purtoi de prova a Pfatten

L purtoi che la firma Iveco adrova per purvé si mesuns, dëssa unì ntegreda tl zënter per l furné segur a Pfatten. “A chësta maniera possa nce la Provinzia se nuzé dla puscion y leprò paia la firma n fit” à spiegà Durnwalder. I adatamënc dl purtoi per mesuns da furné ora de streda vën a custé 3 milion de euro y dëssa unì finanzià mez per un dala Provinzia y la firma Iveco.

Spiegazion de medejines

La Provinzia fajerà recurs ala suneria regiunela che dij che la spiegazions de medejines per talian y tudësch muessa unì garantida da chiche spartësc ora la medejines. Per la Provinzia iel mpurtant che la spiegazions sibe te doi rujenedes, nce sun respunsabltà dl produtëur.