Museums | 30.03.2010 | 13:08

Repartizion nueva per duc i museums tla Provinzia de Bulsan

USP – “Lauré deberieda y se nuzé dla forzes deberieda”. Chësc ie l pensier che à fat tré adum l lëur per y cun i passa 80 museums tla Provinzia de Bulsan te na sëula repartizion provinziela. Pra la prejentazion dla repartizion 42 “Museums”, ncuei (30 merz) a Bulsan, à l assessëura cumpetënta Kasslatter Mur sorissà la gran vela, ma nce la gran defrënza de bujëns che la repartizion nueva uel curì.

Mo mei ne ie la vela de museums tla Provinzia de Bulsan stata tan granda: al mumënt iel passa 80 museums y culezions. La majera pert ie privac a gestion ulentera o tres lies. Leprò iel museums provinziei, chemunei o dla ziteies, ma nce strutures menedes dala Dlieja. L duvier di museums se à mudà dassënn ti ani. I ne ie nia me plu lueges per tenì su, mantenì y lascé udëi testemunianzes storiches. I museums ie for de plu na luegia per dé inant savëi y na luegia de ancunteda culturela. “I museums muessa vester boni de se urienté al publich, tenian cont de chël che l se aspieta y de cie che i se mbincia” à dit l assessëura Kasslatter Mur.

La repartizion nueva uel ti judé a duc i museums a ti vester a chisc duvieres de nosc tëmps. L vën laurà dassënn deberieda cun l’Assoziazion di museums dl Südtriol che ie la lia tët de 40 di ndut 80 museums privac. I 8 museums provinziei fej pert de n’azienda speziela che ie ntegreda tla Repartizion nueva. L Museum Ciastel Tirol y l Museion a Bulsan ne fej nia pert de chësta azienda speziela. La Repartizion di Museums cun si diretëur Othmar Parteli se à tëut dant de sustenì for inò l svilup di museums tla Provinzia de Bulsan, per ti vester a tant che la cundizions sozieles y economiches nueves se damanda. N fin detlarà ie nce chël de miuré la ressorses per l marketig y la relazions publiches. Cun scumenciamënt dl ann, à la repartizion nueva bele metù man si atività che tol ite la spartizion di cuntribuc per strutures privates, la cunsulënza tecnica y la vela de furmazion per i culaburadëures. Te si mans toma nce la scumenciadives a livel provinziel sciche l di nternaziunel di museums che sarà ai 16 de mei o la nuet longia di museums de setëmber.

N cont de finanziamënt à l assessëura Kasslatter Mur sorissa che duta la strutures privates ie autonomes. La Provinzia spënd feter 10 milion de euro al ann, cumpedan pea l custimënt per 61 dependënc y i culaburadëures de sajon y a proiet. Da calculé sëuraprò iel mo la frabiches museales che vën fates da nuef y mantenides ann per ann.

La diretëura de dipartimënt Karin Dalla Torre Pichler à sotrissà che la culaburazion cun i majeri y mëndri museums ie de mpurtanza essenziela. Dantaprima i pitli museums ie na porta per l mont culturel ti luesc.

Di museums provinziei fej nce per l Museum ladin Ciastel de Tor. Che ie anjenià cun de plu scumenciadives sota l motto se ancunté tl museum. Tla cunferënza stampa à l diretëur Stefan Planker prejentà n pont zentrel dl’atività. L Ladinoscop ie n strumënt per mëter a verda ala particulariteies dl mond ladin per sorissé la corelazion danter i mëudli dai dala cuntreda y la manieres de vita. Tl Museum Ladin a S. Martin à n dumënia passeda scumencià la sajon da instà y ie daviert dal merdi ala sada, (dala 10.00 – 18.00) y la dumënia (dala 14.00 – 18.00).

I autri museums provinziei ie l Museum Archeologich a Bulsan, l Museum naturel a Bulsan, l Museum dla minieres te Ridnaun, l Museum dla usanzes y tradizion a Dietenheim, l Museum dl vin a Kaltern, l Museum per la ciacia y pië pësc a Ratschings y l Touriseum a Maran.

Nuviteies, manifestazions y azions cun duta la nfurmazions sun la Repatizion provinziela Museums ie nce da pudëi cialé do sota www.provinz.bz.it/museen tl internet.

Galaria dales fotografies

Prejentà la Repartizion provinziela Museums: la diretëura de dipartimënt Karin Dalla Torre Pichler, l assessëura Sabina Kasslatter Mur y l diretëur de repartizion Othmar Parteli;