Nfurmazion contra la stredes mpifedes
USP – Nia tan pruvedimënc tl frabiché, ma dantaprima na bona nfurmazion ai osc’ y turisc’ per ti vester ala streda de Puster mpifeda. Chësc ie unì ora dala prima senteda dla grupa de lëur cun a cë l assessëur Florian Mussner che à bele ideies cuncretes per ti vester al problem.
![](/news/img/lazy.gif)
Sun la streda de Puster de vieres dl’autostreda ne fovel ai doi de jené nia mesun ruvé inant. “Per via dl gran barat de turisć fova la streda de Puster y l’autostreda n chël di tan sëuraciarieda che l muvimënt se ova mpifà y l fova da aspité giut per ruvé inant” spiega Mussner prejentan nce la zifres. Cun 81.000 mesuns fovel ai doi de jené passa mo n tant de mesuns sun l’autostreda permez a d’autri dis. Me pra la ntreda a Vahrn iel unì cumpedà 13.000 auti.
“Se rendon bën conta che ntan l ann ne iel nia truep de tei dis, ma al bon inuem de nosc raion turistich ie tel situazions de dann”, nsci l assessëur che se à n lunesc ai 21 ancuntà cun reprejentanc di lëures publics, dla mubilità y dl turism deberieda cun i respunsabli dl’autostreda per abiné soluzions ala stredes mpifedes.
Gran pëis uelen ti dé ala nfurmazion di turisć, trajan ite o osć y patrons dla cëses. “L turist muessa bele l di dant y pona mo de plu l di dl viac savëi avisa cun tant de muvimënt sun streda che l ie da fé cont. Nsci muessel savëi ciun che ie l miëur orar y ciunes che ie la stredes alternatives” dij Mussner che tën sun na culaburazion danter SMG, HGV, i cunsorc de turism y la RAS.
La pusciblteies iel de plu: turisć nteressei possa giapé la nfurmazions dla situazion sun streda sun l fonin. L ie tlo debujën che l patron de cësa damanda sce l ghest ie a una y pona che l manda inant l numer de telefonn. L medem servisc pudëssen nce pité tres e-mail, scebën te chësta maniera se adateiel de plu per l di dan l viac. Tla senteda dla grupa de lëur iel nce unì rujenà de mëter i dis de majer muvimënt tofles de nfurmazion eletroniches sun la streda de Puster. La nfurmazions pudëssen nce mandé inant tres la ondes Bluetooth, se nuzan de antënes per arjonjer i fonins aldò ti auti.
Ai 2 de jené an udù che permò do la 9 danmesdì iel stat de plu auti sun streda. “La va de mutivé l turist de muever plu abenëura o nia de sada” spiega Mussner, fajan referimënt a hotiei che pudëssa pité si dispunibltà aldò. La cuntlujion dl assessëur ie de senisiblisé i turisć a muever danter la 6 da duman y la 8 da sëira, a na maniera che l muvimënt se spartësce sun 14 ëura mpede me sun set, danter la 10 y la 5 domesdì.
Nfurmazion dl muvimënt sun streda y de cantieres sun stredes giaten dala zentreles aldò (www.provinz.bz.it/vmz) y dal’autostreda dl Prëner (www.brennerautobahn.it).
as
Mussner: pruvedimënc contra stredes mpifedes
- Scarica il file audio 734 kb