Metà legislatura de Mussner/1: Cumpededa segurea l daunì dla jënt ladina
La cumpededa dla jënt ne à nia me na fazion sun l mumënt ma per i proscimi 10 ani y mo plu inant. Chësc ie stat l pensier prinzipel che l assessëur provinziel Florian Mussner à purtà (NCUEI) ai 04 de agost pra l’ancunteda de metà legislatura cun jurnalisc' n cont dla pert ladina.
Cialan al daunì dla jënt ladina dà l assessëur Mussner gran pëis ala cumpededa dla jënt che sarà chëst ann de utober. „Per seguré y mantenì la cultura ladina ons debujën de pudëi se stizé cun i dërc che nes ie garantì tres l pruporz etnich. Perchël se tratela d’autonn che deberieda se detlaron ladins y che mantenion la proporzion permez al’autra grupes de rujeneda. Na mendranza tla mendranza se fej ert a arjonjer si dërt, perchël vala de tenì adum y ti jì permez a chësc argumënt cun legrëza.“
La pruspetives n cont dla proporzion ne cëla nia ora bën per i ladins: „La cumpëida dla jënt ie tl’autra valedes cresciuda ti ultim ani, tla valedes ladines alincontra nia. Mplu vivel tl’autra valedes scialdi de plu zitadins che ie unic da oradecà a viver tl Südtirol y chisc dajerà bonamënter ju na detlarazion taliana o tudëscia. Per nëus ladins uel chël di che perdessan de proporzion y chësc ulons schivé“ à dit Florian Mussner.
Te chësc mumënt muessa la jënt ladina sëurantò respunsabltà per i proscim 10 ani y per l daunì ajache tres la detlarazion de grupa de rujeneda tolela na dezijion che à cunseguënzes sun la spartizion de finanziamënc per la vita sozioculturela, particularmënter per la stieres publiches, cuatieres soziei y mesuns finanziei per la scoles y la cultura.
Particularmënter canche la se trata de spartizion de na pitla cumpëida de stieres de livel aut ne ti spieta aldò dla proporzion etnica nia na stiera ntiera ai ladins. Nsci à i ladins manco pusciblteies de sëurantò ncëries plu autes. La soluzion che Mussner se à tëut dant per la segonda mesa legislatura ie che la grupa de rujeneda tudëscia o la taliana ti lascei un de si posć a n ladin. A chësta maniera, nsci l assessëur ladin, ne fossel nce nia debujën de aumenté la cumpëida de ncëries de livel aut, che ne ie tl cuntest dl sparanië nia drë realistich.
as
Galaria dales fotografies
Mussner: cumpededa dla jënt possa seguré l daunì
- Scarica il file audio 845 kb
