Dumandes de cuntribuc per jì tla cëses di studënc nchin ai 29 de setëmber
USP – Per l ann de scola 2011/12 puderan inò damandè cuntribuc ala Provinzia de Bulsan per sculeies dla scola elementera y mesana che va te na cësa di studënc. La dumandes possa unì dates ju nchin ai 29 de setëmber 2011 tres n formuler che ie da giapé tl Ufize provinziel per Assistënza scolastica.
I cuntribuc de studi per sculeies dl’elementera y dla mesana ie udui dant per sculeies che ne possa ntan l ann de scola nia viver pra si familia y muessa jì a sté te na cësa di studënc. I cuntribuc unirà paiei ora aldò dl davani dla familia y va da na soma minima de 1200 euro nchin a 2800 euro. Sculeies che ie me ntan l di te na cësa di studënc giapa n cuntribut smendrì dl 30%.
“La sëida dl davani cun detrazions, che vën tëut ca per calculé i cuntribuc ie unida auzeda da 23.000 euro a 25.000 euro” spiega l’assessëura Kasslatter Mur. I formuleres per la dumandes ie da giapé tl Ufize provinziel de assistënza scolastica ulache n possa nce de ju la dumandes. La rejon de unì tëut n cunsciderazion à me la dumandes che vën dates ju nchin ai 29 de setëmber 2011.
Per la dumandes ne iel nia debujen de documentazions ajache uni detlarazion possa unì fata sota la respunsabltà persunela. L unirà fata cuntroi per cialé do sce la detlarazions stimenea bën.
Nfurmazions sëuraprò ie da giapé tl Ufize Assistënza scolastica, tla streda Andreas Hofer 18 (segondo partimënt, ufize 205) a Bulsan o tres telefonn al numer 0471 413305, 0471 412924 o 0471 412925. Nfurmazions y i formuleres per fé dumanda ie nce da giapé sun la plates web dla Provinzia (www.provinz.bz.it/bildungsfoerderung).
as
