Di dla Scola Ladina dedicà a nuviteies y la mujiga tl’educazion
USP – Per dé na ntroduzion al ann de scola nuef mët l Departimënt Educazion y Cultura Ladina dla Provinzia de Bulsan nce chëst ann a jì n di de ajurnamënt y ancunteda per nsenianc de scola, reprejentanc di genitores y aministradëures publics. L Di dla Scola Ladina unirà chëst ann dedicà ala nuviteies dl ann de scola y al valor dla mujiga tl’educazion. Chësc di ie unì metù a jì per l 9 de setëmber tl’università a Persenon cun scumenciamënt da mesa la nuef da duman.
L presidënt dla Provinzia Luis Durnwalder, l assessëur ladin Florian Mussner y l ntendënt Roland Verra rujenerà dla nuviteies ududes dant dala Jonta provinziela, la fazion dla cumpededa dla jënt sun la scola ladina, i mudamënc de carater pedagogich y la reforma dla scoles autes che va n drova chëst ann.
Tla segonda pert dl Di dla Scola Ladina sarà l digan dla Facultà dla Scienzes dla Furmazion Franz Comploj a purté dant n referat sun l valor dla mujiga tl’educazion. Per chësta rejon iel chëst ann nce unì nvià i nsenianc dla scoles de mujiga tla valedes ladines. “Sëuraprò al carater nfurmatif, pieta chësc di nce ucajion de ancunteda danter i nsenianc dla doi valedes ladines de nosta provinzia” spiega l ntendënt ladin. Te chësta ucajion uniral nce dat ora l’edizion nueva dla revista per la scoles ladines “Aules” che trata chëst iede di valores che la scola y l’educazion n generel dëssa dé inant, y di valores dla sozietà de al dindancuei.
as
