Nsenianc ladins fej cursc de furmazion ntan la feries da instà
USP – Passa 200 nsenianc ladins se à ntan chësc instà, ntan si feries, tëut dl’aurela per cursc de furmazion. Chisc ie plu di mec nsenianc dla soles y scolines ladines che à fat i cursc te nosc raion, a Roma o oradecà. L’esperienza dla furmazion y cuntat cun coleghes d’autri raions à dat mutivazion per l ann de scola nuef.
L Departimënt educazion y cultura ladina à de juni, lugio y agost pità na lingia de 13 cursc de furmazion per nsenianc che ie unic nuzei da maestres y maestri dla scolina nchin ala scoles autes. L’esperienza ie stata positiva. Plu de 200 nsenianc y nsci passa mec i nsenianc dla scoles y scolines ladines à fat pea chisc cursc. “Chësc ie n sëni tler che a na gran pert di nsenianc ti stà a cuer la furmazion y l ajurnamënt” dij Theodor Rifesser respunsabl dl ciamp pedagogich dl departimënt. L gran nteres y l se tò dl’aurela per la furmazion prufesciunela ie nce n bon sëni acioche la ann de scola possa scumencé cun nsenianc ajurnei y plëns de mutivazion.
La vela de cursc de furmazion à tratà de plu argumënc. Velch se dà ju cun tematiches plu pedagogiches, d’autri cun tematiches creatives sciche l teater de scola y dessënies di sculeies. Mo d’autri cursc ie mpustei sun cuestions de rujeneda, sciche per ejëmpl n curs spezifich per nsenianc ladins che ie unì pità a Roma. Chësc curs vën bele dai ani pità cun suzes dala scola nternaziunela DILIT. Tlo vëniel nce dat pëis ala pert didatica dl mparé rujenedes.
Vel nseniant dla valedes ladines ie nce unì sustenì per cursc de rujeneda tl raion nglëisc, per i dis de pedagogica pratica a Salzburg y d’autra formes spezieles de furmazion che ne vën nia pitedes tl Südtirol.
as
