Ai 29 y 30 d’agost convëgn sön i lingac y le plurilinguism
USP – N mer de lingac é le titul dl convëgn por le personal insegnant de lingac che gnarà tignì en lönesc y en dedolönesc ai 29 y 30 d’agost a Balsan. La scomenciadia di trëi Departimënc scolastics y dl’Univesité de Balsan à le fin de portè pro a na vijiun plü ampla dl plurilinguism, mostran sö la potenzialité dla conescënza de de plü lingac.
Chësc convëgn se tol dant de pité na vijiun plü ampla dl significat de pluri- y multilinguism cun le fin de ativé les ressurses y les potenzialitês che le contest multilingual de nosc teritore à. Al gnarà analisé la situaziun atuala dal punt de odüda soziocultural, psicolinguistich, neurolinguistich y glotodidatich; inće sura i confins dla provinzia fora. I argomënć tratà sarà lià al avijinamënt ai lingac y ales manires da insigné y da imparè desvalies.
Danmisdé saràl döes relaziuns le pröm dé y trëi le secundo dé, olache n valgügn esperć de sozio- y neurolinguistica jarà ite plü avisa tla situaziun atuala y tles prospetives por le dagnì de nosta sozieté plurilinguala y multiculturala. Domisdé vëgnel metü a jì 15 workshops, te chi che al vëgn tratè temesc lià al insegnamënt di lingac.
Le convëgn “Sprachenmeer - Un mare di lingue - N mer de lingac- A sea of languages” mët man
en lönesc ai 29 d’agost,
dales 8.30 tl hotel Sheraton, strada Buozzi 35 a Balsan.
Danter i reladus saràl inće le prof. Franz Comploj che baiarà de lingaz, musiga y movimënt. Erna Flöss baiarà dl imparè ladin, y Hannelore Insam y Alexandra Insam baiarà dl proiet “vares tl plurilinguism - tla scolines ladines”. Le secundo dé baiarà Theodor Rifesser dla didatica linguistica integrada tles scolines y scores ladines.
La scomenciadia é piada ia dai trëi Departimënć scolastics y dal’Université Lëdia de Balsan y ara é ponsada por düć i insegnanć de lingaz de vigni ordinn de scora y por maestres dla scolina.
as
