Jonta provinziela per butëighes stlutes de dumënia
USP – La Jonta provinziela ie n linia de mascima de chëla che la butëighes dëssa de dumënia resté stlutes. A chësta maniera se mët i assessëures provinziei contra na liberazion generela di orars de giaurida dla butëighes. Ntan l’ena y la sades dëssa i chemuns pudëi tò na dezijion.
A livel europeich y cun ratificazion taliana iel unì liberalisà i orars de giaurida dla butëighes. La Jonta provinziela fej valëi si cumpetënza tla materia y à rujenà de ulëi dé ora na norma aldò. “Da mesdì y da sëira, ma nce la sades dëssa i orars dla butëighes unì regulamentei tres urdenanza di ambolc, ma de dumënia dëssa la butëighes resté śaredes” à dit l presidënt Durnwalder (NCUEI) ai 29 de agost do la senteda dla Jonta. Na ezezion uel la Jonta udëi dant te raions turistics, per butëighes dai souvenir. Na cërta flessiblità ulëssen nce ti lascé a uni chemun, te chëla che i ambolc possa fé ezezions 5 o 6 iedesc al ann.
Tan inant che va la cumpetënza provinziela de chësta materia ie mo da stlarì. “L Stat vëija la lege sun i orars de giaurida, na lege de reforma” à dit l presidënt dla Provinzia, nsci messessela nce unì metuda n drova tlo da nëus. Śën vala de stlarì ulà che ie la sëida dla cumpetënza provinziela.
as
Landeshauptmann Durnwalder über die Ladenöffnungszeiten an Feiertagen
- Scarica il file audio 467 kb
