Sun Resciesa, tl parch naturel, vëniel metù a post i troies
USP – Ti proscimi dis uniral sun ncëria dl Ufize provinziel per i parcs naturei y l Ispetorat furestel de Persenon scumëncia lëures per mëter a post i troies sun Resciesa, tl parch naturel Puez – Odles. I lëures ie unic azetei dal cunsëi de aministrazion dl parch naturel.
I lëures reverda l troi 31 sun Resciesa daujin a ulache l fova bele l ann passà unì fat lëures. Cun chësta pert di lëures uniral metù a post l toch sëura la utia de Resciesa de viers dla Locia da Fliz y l toch plu curt nchin pra la utia. L vën fat crëscer ite i troies da na pert ora ulache l ie unì a se l dé erojion. Per judé do che la ierba possa crëscer uniral nce stierdù chetum. ”Canche i lëures sarà finei, sarà l troi me plu de 80 zentimetri” dij l prim laurant Egon Trocker.
La mont de Resciesa à na valuta particulera. Dal ann 1999 ie l toch sëura l Troi Paian pert dl Parch naturel Puez-Odles, da ntlëuta se cruzia l Ufize provinziel per parcs naturei deberieda cun l Ispetorat dla furestel de mëter a post, n puech al iede, i troies da mont. La gran cumpëida de persones sun Resciesa cumporta la ntensificazion de n fenomenn naturel: la particularità geologica porta pro che me na pitla plea tla veja se gëura su nchin a mené demez tiera.
“Per mantenì la cuntreda tan atrativa, vëniel curì pro y fat crëscer ite troies dlongia ora o che ie te raions resservei ai tieres reres” spiega Astrid Wiedenhofer, culaburadëura dl Ufize provinziel nciarieda per l parch naturel Puez – Odles.
as
