40 milion dl fond de rotazion: Jonta sustën l turism
USP – La Jonta provinziela à spartì su 40 milion de euro che ruva tl fond de rotazion per sustenì l’economia. Te si senteda (da NCUEI) ai 06 de setëmber à i assessëures provinziei tenì cont particularmënter dla dumandes tl ciamp turistich ulache n aspieta bele giut.
Cun 25 milion de euro ie plu de mesa la soma de scioldi frësc che unirà metui tl fond de rotazion per l’economia, ie unic destinei al turism. “Ulon che l sibe te duc i ciamps feter unfat giut da aspité, perchël ons chëst iede dat na majera pert al turism ulache n aspieta bele trëi ani” à spiegà l presidënt Durnwalder riesc do la senteda dla Jonta.
De mëndra somes ie unides destinedes per cater d’autri ciamps economics: 5 milion de euro per l’agricultura, 4 milion per l cumerz, 3 milion per l artejanat y 3 milion per la ndustria.
Per i mprësć che reverda l ciamp turistitich à l presidënt spezificà che proiec per passa 500.000 euro puderà me plu unì tëuc n cunsciderazion sce i ie te raions turisticamënter nia svilupei.
as
