Jonta provinziela recunësc la matura paritetica ladina
USP – La Jonta provinziela de Bulsan à (NCUEI) ai 19 de setëmber recunesciù la matura paritetica ladina azetan che la dëssa nce unì recunesciuda per l trilinguism “B”. La pruposta dl assessëur ladin Florian Mussner unirà data inant ala Cumiscion di Sies per adaté la norma de atuazion al Statut de Autonomia.
L ejam de matura tla scoles paritetiches ladines garantësc la cunescënza dl tudësch, talian y ladin. Sce n possa mustré su da avëi fat 10 ani de scola paritetica ladina, pona dëssa l’ejam de matura valëi per l trilinguism de livel “B”. “Cun la segonda ëura de ladin nce tla scoles autes ons fat n prim var per garantì la cunescënza de rujenedes de nosc sculeies. Chësc ie śën stat l segondo var acioche la matura ladina possa valëi sciche atestazion de trilinguism” spiega Florian Mussner.
Aldò dla suneria Europea ne possel nia plu vester che la cumiscion de ejam de bi- y trilinguism sibe la sëula che atestea ufizialmënter la cunescënzes dla rujenedes provinzieles. Cun na norma de atuazion al Statut de Autonomia fovel d’auril 2010 unì recunesciù che na matura de scola tudëscia y l avëi finà via na università de rujeneda taliana vel per giapé automaticamënter l bilinguism de livel “A”. L medemo per na matura taliana cun n studi de rujeneda tudëscia.
Śën à la Jonta provinziela azetà che nce la matura paritetica ladina vënie recunesciuda te chësc cuntest. La defrënza ie che l finé via de na scola auta tla valedes ladines vel sciche atestazion de duta trëi rujenedes provinzieles, l tudësch, talian y ladin. Perchël ne iel nce nia de bujën de n n titul universiter tl’autra rujeneda.
Aldò dl pruporz, udù dant dal Statut de Autonomia, muessa i zitadins de rujeneda tudëscia o taliana mustré su n atestat de bilinguism per fé pea n cuncors per na stiera publica. I zitadins ladins muessa mustré su de savëi duta trëi rujenedes provinzieles.
as
