Jonta aspieta sun Chemuns per la rë de strom
USP – Nchin ala fin dl ann se aspieta la Jonta provinziela na resposta dai chemuns sce i uel se nuzé de si dërt de cumpré ju la rë de spartizion dl strom te si raion. Chësta rë ie chëst ann passeda dal’Enel ala Selnet.
La Jonta provinziela à te si senteda (DA NCUEI) dl 03 de utober cialà ala situazion dla rë de spartizion dl strom che fova chëst ann unì cumpreda ju dal’Enel. I Chemuns à l dërt de cumpré ju la pert de rë che reverda si raion. Nchin ala fin dl ann dëssi fé al savëi sce i uel nuzé chësc dërt y sce i uel mantenì l servisc tres la Selnet o sce i uel nstës l tò tla man.
Da stlarì restel ntant mo sce i chemuns possa dé inant la pert de rë a si servijes o sce l ie debujën de n cuncors.
“La rë ie mplu nce drët melciafieda ajache ti ultimi ani à la Enel lascià demez duc i lëures che ne fova nia de mascima priorità” à dit l presidënt Durnwalder do la senteda dla Jonta. Tres la Selnet à la Provinzia udù dant n program de ressanamënt de chësta rë cun n custimënt de 20 milion al ann.
as
