Aministraziun | 03.10.2011 | 15:25

Jonta provinziela: bonamënter me na reduzion dl bilanz de 2%

USP – Nchin ala fin de utober muessa la Jonta provinziela dé inant la pruposta dl bilanz provinziel 2012 al Cunsëi provinziel. Te si senteda (da NCUEI) dl 03 de utober à la Jonta provinziela scumencià a udëi dant na mpustazion generela cun na reduzion ntëur al 2%. Nsci na reduzion scialdi mëndra de chël che n minova te n prim mumënt.

La gran dificulteies finanzieres dla Talia à nce per la previjion dl bilanz provinziel 2012 na gran nfluenza. Per miuré la licuidità dl Stat vëija la manovra finanziera dant che nce la Provinzia de Bulsan ne possa, aldò de na calculazion de n tant per persona, nia dé ora 280 milion de euro. Nce sce per n auter ann iel udù danora 130 milion de ntredes de plu, muessa la Jonta provinziela udëi dan ora ulà destiné l’autra 150 milion de bilanz che ne possa pona nia unì dates ora. “Na pert de chisc scioldi ulons mëter ti doi fonds de rotazion: chël per i lëures publics di chemuns y chël per l’economia” à dit l presidënt Durnwalder riesc do la senteda dla Jonta.

Ti capituli dl cuatieres soziei iel 200 milion de euro che ne ie per via de gaujes tecniches mo nia unica dai ora. “Dan junté scioldi frësc te chësc capitul, dëssel n iede unì adurvà i vedli” à dit l presidënt dla Provinzia.

N generel fej la Jonta provinziela cont che l bilanz da n auter ann sarà feter 2% mënder permez a chël da chëst ann. La soma ududa dant ie te chësc mumënt ntëur la 5,2 milion de euro. Nchin ala proscima senteda dëssa i singuli assessëures udëi danora co sparanië chësta perzentuela te si capituli. I ciamps ulache aldò de Durnwalder ne uniral nia smendrì i capituli reverda la scoles, l soziel cun la segurazions dla cures, la sanità, l lëur, la mubilità y la tueda.

La njonta regiunela (de 1,4%) dla chëuta IRPEF dëssa unì lasceda do per families cun mutons. “Particularmënter ulëssans ti unì ancontra a families cun mutons che ie te na categuria mesana de davani” à dit Durnwalder. Pra la chëuta IRAP uelen ti unì ancontra a chëla firmes che à da mustré su na gran produtività, stieres stabiles y che se debe ju tla tueda y svilup.