Daurida l’oasa de palsa Pantan Sarè a Pedraces
USP – Le bel tëmp y le gran interès de feter 90 ghesc' à acompagné la daurida dl’oasa de palsa Pantan Sarè a Pedraces. L’assessur provinzial Michl Laimer à invié ia l’ativité dla cuinta de indöt 10 oases de palsa programades pro les fontanes storiches de ega minerala.
"Tres chësc proiet désson s’intëne tan importanzta che l’ega é. Ara n’un va nia de n valur ma material, mo dantadöt de n valur ideal, ajache nos düć depenun dal’ega“, à splighé l’assessur provinzial Michl Laimer pro la daurida dla oasa de palsa, che al à inaudè deboriada cun l’ombolt de Badia, Iaco Frenademetz y Astrid Sapelza, geologa dl Ofize provinzial Gestiun ressurses d’ega. Dla cornisc musicala s’à cruzié la 4. y la 5. tlassa dla scora elementara da San Linert y le grup de percuscionisć J.E.M.. Siur Franz Sottara à benedì la costruziun y l’ega.
La oasa de palsa Pantan Sarè é tl comun de Badia a 1.363 metri sura le livel dl mer y é do i Bagns de Taufer a Tscherms, de Rumestluns a La Val, le Bagn Lad a St. Pankraz y Überwasser a Ulten la cuinta de indöt 10 oases de palsa de fontanes de ega minerala.
Bele dl 2007 él gnü a se le dè l’idea de fà a na moda da ti rové pormez ales eghes minerales dl Südtirol, ajache tröpes de chëstes fontanes ne gnô nia plü adorades. Dl 2008 àn metü man cun le proiet cun chël che al dê gnì ressanè les fontanes y i fistis dê invié a ćiarćé. "A chësta moda orunse recordè la vedla tradiziun di bagns tl Südtirol, che à albü süa floridöra tl scomenciamënt dl secul passè y che ê conesciüda sura i confins fora", à sotrissé l’assessur provinzial Laimer.
L’ega de Pantan Sarè gnô bele da vedlamënter incà aprijada sciöche meso cuntra le romatisc, les maraties dla pel y les dificoltês da trà le fle. L’ega é pura a livel bateriologich, mo ara à n tof bindebò sterch. Chëst’ega vëgn tlassificada sciöche ega lisiermënter mineralisada y da fluor y ara à na temperatöra de 7,1 degrà.
usp
