Plata web dl ASTAT sun la cumpededa dla jënt
USP - Cun l 9 de utober scumëncia la 15ejima cumpededa dla jënt che dëssa purté n cheder statistich dla chemunanza tl Südtirol. Co che che chësta nrescida vën trata tres, cie che ti spieta ala families y la pusciblteies nueves de respuender ai cuestioneres, possen cialé do sun la plata web dl ASTAT dedicheda ala Cumpededa dla jënt.
Uni 10 ani vëniel te dut l raion naziunel fat na nrescida sun la chemunanza, populazion y i cuatieres, per arjonjer n cheder atualisà dla situazion. Chësta nrescida ne vën nia me fat sun na selezion de zitadins, ma l vën damandà duc. Chësta nrescida che vën tlo da nëus fata dal Istitut de statistica ASTAT y cumporta n grandiscim mpëni davia che l muessa unì laurà ora i cuestioneres, svilupà programs per computer, nsenià ju la jënt che va tla cëses y nfurmà i chemuns per si pert de chësta nrescida.
Per i zitadins iel ënghe debujen de nfurmazion acioche l posse unì dat respostes a melsegurëzes y per arjonjer nsci n resultat che spidla mo miec la realtà. Na funtana de nfurmazion ie de chësc viers la plata web dl ASTAT che ie da abiné al adres www.provinzia.bz.it/volkszaehlung. Tlo iel da abiné nfurmazion sun i cuestioneres, sun la modaliteies dl respuender, dl dé ju la respostes y dla dates. Sun chësta plata web possen nce cialé do la nuviteies dl sistem de detlarazion de grupa de rujeneda che vën tl Südtirol fat deberieda cun la Cumpededa dla jënt.
as
