Defendura di tieres y campania sun la castrazion de giac
USP – L assessëur al’agricultura Hans Berger à prejentà dac sun la defendura di tieres y la campania nueva sun la castrazion de giac. Chësc ne ie nia unì fat n di per cajo: (NCUEI) ai 4 de utober ie l di nternaziunel per la defendura di tieres y di de S.Francësch, patron di tieres.
“La lege che la Provinzia de Bulsan à per la defendura di tieres ie de ejëmpl per la Talia” à dit l assessëur Hans Berger, ntan la cunferënza stampa a Bulsan. Do che l ie unì nvià via l di mundiel per i tieres dl 1931 se à ti ultimi 80 mudà truep n cont dla defendura ti tieres. “Nosc duvier ie de fé sensibilisazion per chësc argumënt de gran mpurtanza y de scunjeré esagerazions da tramedoi pertes” à dit l assessëur provinziel. La mira ne ie aldò de Berger nia de traté tieres sciche persones, ma de na drëta mesura de amor per i tieres, ti judan y i defendan dal mel.
Da pert dla Provinzia iel tl 2011 unì sustenì 11 assoziazions di tieres cun de ndut 310.000 euro. Sëuraprò vën la cësa per tieres Sill a Bulsan finanzieda dala Provinzia. De ndut vëniel dat ora feter na milion de euro al ann per la defendura di tieres.
L ie da desferenzië la defendura de tieres de cësa y tieres da stala. Aldò dla urdenanza europea 1099/2009 jirà cun jené 2013 n drova regules plu sciorfes per tò via bestiam. Tl ciamp di tieres de cësa iel unì anjenià na campania de sensibilisazion cun l slogan “castrazion straverda i giac da soferënzes”. Placac, julantins y nfurmazion vën data inant dal Servisc provinziel di dutores dai tieres, l’urganisazions di tieres, i dutores dai tieres, la scoles de agricultura, l’assoziazion di paures y l’assoziazion di chemuns.
Tl Südtirol iel feter 55.000 giac y 33.000 cians. Feter 1.500 giac vif te feter 150 colonies de giac spartides su te dut Südtirol. “Cun la castrazion possel unì schivà la multiplicazion de giac y nscì truep patimënt” à dit Berger. La castrazions vën fates dal Servisc provinziel de sanità, tl zënter dai tieres Sill y dai dutores dai tieres. Assoziazions di tieres mët a jì de plu azions de castrazioins de ciac zënza patron.
Da nuef ie nce unì fat n cudejel sun mëndri y tieres y na DVD che spiega l drë cumpurtamënt cun tieres. Chisc materiai ie da giapé tl Servisc Saniter y vën nce adurvà tla scoles.
as
